शुद्धोधन २ स्थित कृषकहित सहकारीको २४औँ साधारणसभा तथा नेतृत्व चयन

[sharethis-inline-buttons]
नगेन्द्र केसी
शुद्धाेधन रुपन्देही
रुपन्देहीको शुद्धोधन २ भुजौली स्थित कृषकहित स्वावलम्बन बचत तथा ऋण सहकारी संस्थाको अध्यक्षमा शंकरप्रसाद गौतम निर्वाचित हुनुभएको छ ।
नवनिर्वाचित संस्थाको सञ्चालक समितिको उपाध्यक्षमा दिनेश यादव, सचिवमा उमेश ज्ञवाली, कोषाध्यक्षमा गणेश पासी तथा सदस्यहरुमा मञ्जु पंगेनी भण्डारी, लीला गौतम, प्रकाश चौधरी, रामकुमारी थारु र दीपक ज्ञवाली रहेका छन् । यसैगरी संस्थाको लेखा सुपरीवेक्षण समिति संयोजकमा अञ्जु के.सी. र सदस्यहरुमा गोविन्द श्रेष्ठ र विनोद काफ्ले निर्वाचित भएका छन् ।सहकारी संस्थाको २४औँ साधारणसभाले आगामी चार वर्षका लागि सर्वसम्मत रुपमा नयाँ नेतृत्व चयन गरेको हो ।
संस्थाका अध्यक्ष उमाकान्त चपाईंको अध्यक्षतामा सम्पन्न साधारणसभामा शुद्धोधन गाउँपालिकाका अध्यक्ष विष्णुप्रसाद बस्यालकाे प्रमुख आतिथ्यतामा भएको कार्यक्रममा प्रमुख अतिथि विष्णुप्रसाद बस्यालले सहकारीले स्थानीय समुदायको आर्थिक विकास र आम किसानहरुको जीवनस्तर माथि उठाउन महत्वपूर्ण भूमिका खेल्ने विचार व्यक्त गर्नुभएको थियो । कार्यक्रमका विशिष्ट अतिथि शुद्धोधन गाउँपालिका उपाध्यक्ष शान्तादेवी ज्ञवाली र वडा नं. २ का वडाध्यक्ष कमल खड्काले यस क्षेत्रकै अग्रणी यस सहकारी संस्थाले महत्वपूर्ण भूमिका निर्वाह गरेको बताउँदै समुदायको हितका लागि सदैव सहकार्य गर्ने विचार व्यक्त गर्नुभएको थियो।
उक्त साधारणसभामा शुद्धोधन गाउँपालिकाका सहकारी विभाग प्रमुख मानबहादुर भण्डारी, संस्थाका प्रमुख सल्लाहकार जगत के.सी., भुजौली बोर्डिङ स्कुलका प्राचार्य झलक थापा, महाकल्प कृषि सहकारी संस्थाका अध्यक्ष चिन्तामणि खरेललगायतले शुभकामना मन्तव्य व्यक्त गर्नुभएको थियो । संस्था स्थापनाको २५ वर्ष पूरा गरेको रजत जयन्तीका अवसरमा संस्था स्थापना गर्ने संस्थापक २५ जना सदस्यहरुलाई सम्मान गर्नुका साथै नियमित बचतकर्ता, असल कारोबारी तथा एसईईमा ३.६५ भन्दा बढी जिपिए ल्याउने सदस्यका सन्ततिलाई समेत सम्मान गरेको थियो ।संस्थाका सचिव शंकरप्रसाद गौतमले सञ्चालन गरेको साधारणसभामा सदस्य उमेश ज्ञवालीले स्वागत मन्तव्य व्यक्त गर्नुभएको थियो।साधारणसभामा सञ्चालक समितिका तर्फबाट अध्यक्ष उमाकान्त चपाईंले प्रस्तुत गरेको नीति तथा कार्यक्रम र बजेटसहितको वार्षिक प्रतिवेदन पारित गरेको छ ।
संस्थाका लेखा समिति संयोजक अन्जु के.सी.ले प्रस्तुत गरेको आन्तरिक लेखा समितिको प्रतिवेदन तथा लेखा परीक्षक लुम्बराज ज्ञवालीले गरेको आ.व. २०७९/८० को लेखापरीक्षण प्रतिवेदन सर्वसम्मतिले पारित गरेको छ । यसैगरी सभाले सेयर सदस्यहरुलाई गत वर्षको नाफाबाट १८ प्रतिशत सेयर बोनस वितरण गर्ने निर्णयसमेत गरेको छ ।साधारणसभाबाट नयाँ नेतृत्व चयन गर्नका लागि झलक थापाको संयोजकत्वमा फौज्दार मल्लाह र खडानन्द उपाध्याय सदस्य रहेको निर्वाचन मण्डल गठन गरिएको थियो । उक्त समितिले निर्वाचनको सम्पूर्ण प्रक्रियाहरु पूरा गर्दै सर्वसम्मत रुपमा नयाँ नेतृत्व चयन गरेको हो ।
९२४ जना सेयर सदस्य रहेको सहकारी संस्थाको असार मसान्तसम्म २ करोड ३८ लाख १ हजार २ सय रुपैयाँ सेयर पूँजी रहेको छ । संस्थाको बचत निक्षेप ८ करोड ४२ लाख ३४ हजार १४ रुपैयाँ रहेको छ भने ऋण लगानी १३ करोड ९५ लाख ६२ हजार १३ रुपैयाँ रहेको छ । संस्थाले आ.व.२०७९/८० मा ६९ लाख ५६ हजार ९ सय २४ रुपैयाँ नाफा गर्न सफल भएको छ ।


प्रकाशित : २०८० कार्तिक ४, शनिबार १९:४३