लुदस, तौलिहवा
कपिलबस्तुमा विभिन्न स्थानमा माटोबाट बनाईएका कलात्मक मुर्तिहरु विर्सजन गरिएको छ । बिजया दशमीका अवसरमा स्थापना गरिएका दुर्गा भगवतीको मुर्ति विसर्जन गरिएको हो । स्थानीय नदीनालामा बाजागाजासहित दुर्गा भगवतीको मुर्ति विसर्जन गरिएको हो ।
जिल्लाका १० स्थानीय तह अन्तर्गत बिभिन्न चोक बजार गाउँमा दसैंको अवसरमा मूर्ति प्रदर्शन गरिएको थियो । नवरात्रका अवसरमा निकालिएका मूर्तिहरुको बिशेष हवन गरिएको थियो । जिल्ला प्रशासन कार्यालयअनुसार कपिलवस्तुका १० स्थानीय तहमा साढे ३ सय बढी दुर्गा भगवतीको मूर्ति बनाइ प्रदर्शनमा राखिएको थियो ।
२० हजारदेखि ६० हजार बढी मूल्यका मुर्तिहरु ठाँउ ठाउँमा राखिएको थियो ।
विगतमा लक्ष्मणघाट क्षेत्रमा विर्सजन गर्ने गरेका दुर्गा मुर्ति विर्सजन गत वर्षदेखि लक्ष्मणघाट देखि करिव १ किलोमिटर तल भग्लापुरमा विर्सजन गरिएको हो । त्यस स्थानमा मात्रै करिव ३ दर्जन मुर्ति विर्सजन गरिएको हो । दुर्गा मूर्तिलाई भक्तजनले बाणगंगा नदीको रामघाट, सुरई बेल नदी तथा कष्णनगर क्षेत्रका नदी, पोखरीहरुमा भब्यरुपमा बिसर्जन गरेका छन् ।
नवमी, दशमी र एकादशी गरी तीन दिन मूर्ति बिसर्जन गरिएको छ । नवरात्रमा दुर्गा भगवतीको ब्रत बसी पूजापाठ गर्नाले मनोकक्षां पूरा हुने धार्मिक बिश्वास रहिआएको छ । मूर्ति सेलाउने बिभिन्न स्थलमा मेला समेत लागेको थियो ।
सम्भावित घटनालाई मध्यनजर गर्दै ठाउँ ठाउँमा प्रहरी परिचालन गरिएको थियो । कृष्णनगरमा मंगलवार नै सुरक्षा घेराभित्र मूर्ति बिसर्जन गरिएको थियो । प्रमुख जिल्ला अधिकारी शंकरहरि आचार्यले मूर्ति विसर्जनका क्रममा हुन सक्ने सम्भावित झडप र घटनालाई रोक्न जिल्लाभर शान्ति सुरक्षालाई मजबुत पारिएको बताउनुभयो ।
मूर्ति विसर्जनका क्रममा कहीं कतै अप्रिय घटना नभएको उहाँको भनाइ छ । तौलिहवा र त्यस आसपास निकालिएको झाँकीलाई भक्तजनले नगर परिक्रमा गराई रामघाटमा लगेर विसर्जन गरेका छन् । बाजागाजा र नाचगानसहित भक्तजन रामघाट नदी पुगेका थिए ।
