हरि आचार्य, कपिलवस्तु
श्री आधारभुत विद्यालय घरबुधियामा शिक्षक विदाई तथा स्वागत कार्यक्रम सम्पन्न भएको छ । कपिलवस्तुको बाणगंगा नगरपालिका वडा नं. ११ घरबुधिया स्थित श्री आधारभुत विद्यालय घरबुधियामा नियमित अवकाश पाउँनुभएका शिक्षक बच्चुराम चौधरीलाई विदाई र भर्खर सरुवा भएर आउनुभएकी शिक्षिक रीता चौधरीलाई स्वागत गरिएको हो ।
कार्यक्रमका प्रमुख अतिथि शिक्षा विकास तथा समन्वय ईकाई कपिलवस्तुका प्रमुख थानेश्वर घिमिरेले विदाई हुने शिक्षकलाई निवृत्त जीवन सुखमय होस् भन्ने भन्ने शुभकामना व्यक्त गर्दै शिक्षिक रीता चौधरीलाई विद्यालयमा स्वागत गर्दै सफल कार्यकालको शुभकामना व्यक्त गर्नुभयो । उहाँले विद्यालयको समग्र शैक्षिक अवस्था सुधार गर्नका लागि शिक्षक, विद्यार्थी अभिभावक सबै एक भएर लाग्न आवश्यक रहेको बताउनुभयो । सामुदायिक विद्यालयमा पनि राज्यको धेरै लगानी भएकाले विद्यालयलाई नमुना बनाउने गरि काम गर्नुपर्नेमा जोड दिनुभयो ।
त्यस्तै कार्यक्रमका विशिष्ठ अतिथि बाणगंगा नगरपालिका शिक्षा, युवा तथा खेलकुद शाखा प्रमुख खिम बहादुर जिसीले विदाई तथा स्वागत निरन्तर चलिरहने प्रक्रिया रहेको बताउँदै नगरपालिकाले सामुदायिक विद्यालयको गुणस्तर वृद्धिका लागि लागिपरेको बताउनुभयो । उहाँले नगरपालिकाले योजना बनाउँदा विद्यालयको आवश्यक योजना माग गर्न अनुरोध गर्दै सम्बोधन गर्ने बताउनुभयो ।
त्यस्तै वडाध्यक्ष नरेन्द्र प्रसाद चौधरीले सामुदायिक विद्यालयलाई अगाडि बढाउनका लागि वडाबाट सक्दो प्रयास गरिरहेको बताउनुभयो । उहाँले यस क्षेत्रका स्थानीय विद्यार्थीहरुलाई विद्यालयमा गुणस्तरिय शिक्षा दिई उनीहरुको भविष्य उज्जवल बनाउनका लागि सबै एकजुट हुनुपर्नेमा जोड दिनुभयो ।
स्वागत मन्तब्य राख्दै विद्यालयकी प्रधानाध्यापक लक्ष्मी विसीले विद्यालयको अवस्थाबारे जानकारी दिनुभएको थियो । उहाँले विद्यालयको आन्तरिक स्रोत नभएका कारण समस्या परेको बताउँदै यस तर्फ ध्यान दिन अनुरोध गर्नुभएको हो । उहाँले अवकाश पाउनुभएका शिक्षकको योगदान अतुलनीय रहेको बताउदै सरुवा भई आउनुभएकी शिक्षिकालाई स्वागत गर्नुभएको थियो । प्रधानाध्यापक विसीले विद्यार्थीको संख्या पनि राम्रै रहेको, शौचालय, खानेपानीको समस्या रहेकाले यसको व्यवस्थापन गर्नुपर्नेमा जोड दिनुभयो ।
कार्यक्रममा नृत्य मार्फत विद्यार्थीहरुले मनोरञ्जन प्रदान गरेका थिए ।
विद्यालय ब्यबस्थापन समितिका अध्यक्ष भगवानदास चौधरीको अध्यक्षता, शिक्षा विकास तथा समन्वय ईकाई कपिलवस्तुका शाखा अधिकृत चोपलाल बेल्बासे, वडा सदस्य वाजबुल लैन शाह, पुर्व प्रधानाध्यापक, शिक्षक, विद्यार्थीहरुको उपस्थिती रहेको कार्यक्रम शिक्षक अनन्तराज गैरेको सञ्चालनमा सम्पन्न भएको थियो ।
वि.स. २०३२ सालमा स्थापना भएको उक्त विद्यालयमा हाल १ सय २० जना विद्यार्थी अध्ययनरत रहेको विद्यालयका प्रधानाध्यापक लक्ष्मी विसीले जानकारी दिनुभएको छ ।
