हरि आचार्य, कपिलवस्तु
कपिलवस्तुको बाणगंगा ३ गंगौलियामा अवस्थित लुम्बिनी भिजन कलेजको कक्षा १२ मा अध्ययनरत विद्यार्थीको आयोजनामा कक्षा ११ का विद्यार्थीहरुलाई स्वागत गरिएको छ । रुपन्दहेहीको ढबाहामा अवस्थित आरम्भ रिसोर्टमा आयोजित कार्यक्रममा कक्षा ११ का विद्यार्थीहरुलाई कक्षा ११ का विद्यार्थी, कलेजका सिईयो, क्याम्पस प्रमुख, शिक्षक लगायतले टिका खादा सहित स्वागत गर्नुभएको थियो ।
कार्यक्रमका प्रमुख अतिथि राष्ट्रिय परिक्षा बोर्ड बुटवल शाखा प्रमुख रोमाकान्त तिवारीले लुम्बिनी भिजन कलेज जिल्ला प्रदेश मात्रै नभएर राष्ट्रमै उत्कृष्ट विद्यालयको रुपमा स्थापित हुनुपर्नेमा जोड दिनुभयो । उहाँले शिक्षासंगै मानवीय व्यवहारमा समेत सुधार गरि सभ्य नागरिक बन्न विद्यार्थीलाई सुझाव दिनुभयो । प्रमुख तिवारीले विद्यालयको शैक्षिक गुणस्तरसंगै प्रविधिमैत्री शिक्षण सिकाई क्रियाकलापमा जोड दिएको भन्दै कलेजको प्रशंसा गर्नुभयो ।
कार्यक्रममा कपिलवस्तु भिजन कलेजका अध्यक्ष सरोज खनालले कलेजको स्थापना देखि अहिलेसम्मका क्रियाकलापको बारेमा स्पष्ट पार्नुभयो । उहाँले आगामी दिनमा प्राविधिक शिक्षामा जोड दिंदै मास्टर तहको कार्यक्रम सञ्चालन गर्ने बताउनुभयो ।
त्यस्तै क्याम्पस प्रमुख सुन्दर पाण्डेले कक्षा ११ का विद्यार्थीलाई स्वागत गर्दै विद्यार्थीहरु कलेजको गहना भएको बताउनुभयो । प्रमुख पाण्डेले विद्यार्थीहरुलाई अध्यापनसंगै हरेक क्षेत्रमा सभ्य नागरिक निर्माण गर्ने कलेजको उद्देश्य रहेको बताउनुभयो । उहाँले कलेजमा बातानुकुलित कक्षाकोठासंगै पुर्ण प्रविधिमैत्री माध्यमबाट अध्यापन गराउने जिल्लामै एक मात्र कलेज लुम्बिनी भिजन कलेज रहेको बताउनुभयो । निकट भविष्यमा कपिलवस्तु सहित छिमेकी जिल्लाबाट विद्यार्थीहरु यस कलेजमा अध्यापनका लागि आउने वातावरण सिर्जना गर्ने बताउँदै विद्यार्थीहरुको आवश्यक सल्लाह सुझाव अनुसार अगाडि बढ्ने प्रतिवद्धता व्यक्त गर्नुभयो ।
कार्यक्रममा चर्चित गायक कमल खत्रीको उत्कृष्ट मनोरञ्जनात्मक प्रस्तुतीमा विद्यार्थीहरु झुमेका थिए ।
कक्षा १२ तथा ११ का विद्यार्थीहरुले विभिन्न उत्कृष्ट सांगितिक प्रस्तुतीहरु प्रस्तुत गरेका थिए ।
कक्षा १२ का विद्यार्थी बिकास कार्कीको अध्यक्षता, क्याम्पसका सिईयो युवराज पोख्रेल, कार्यसमिति सदस्य, सम्पुर्ण शिक्षकको आतिथ्यता, कक्षा १२ तथा ११ का विद्यार्थीहरुको उपस्थिती रहेको कार्यक्रम कक्षा १२ का विद्यार्थी सलिना घिमिरेको स्वागत मन्तब्य तथा जानबी थापाको सञ्चालनमा सम्पन्न भएको थियो ।
