माया के सी
३ पुष २०८१, बुधबार
अनुप सुनार कक्षा १२ मा अध्ययनरत विद्यार्थी हुन् । उनलाई अहिले विद्यार्थीसँगै भलिबलका खेलाडीको रूपमा चिनिन्छन् । पर्वतको विहादी गाउँपालिकामा कक्षा १० सम्मको अध्ययन पुरा गरेपछि माथिल्लो कक्षा पढ्न उनी बुटवल झरे । सुनारलाई यहाँ आएपछि पढाइसँगै खेललाई पनि सँगै अगाडि लैजाने सोच बढ्यो । उनी भन्छन्, जीवनमा जसरी पढाइको महत्व छ त्यसरी नै खेलको पनि । स्वास्थ्य जीवन र मनलाई शन्ति पार्न पनि खेल आवश्यक छ । त्यसैले पनि मलाई सबै खेल मनपर्छ । त्यो मध्ये मेरो रोजाईको खेल भलिबल हो ।
सानैदेखि नै आफ्नै घर आँगनमा भलिबल खेलेको देखेर हुर्किए त्यसैले पनि मेरो रगत रगतमा भलिबल छ जस्तो लाग्छ । सानैमा पनि गाउँमा दाईहरू खेलेको देख्दा खुब जोस आउँदै थियो मलाई । त्यसबेला पनि सबैले यसले पनि खेल्न सक्छ भन्नु हुन्थ्यो । मनले नै खेल्छु, जस्तो पनि लाग्दथ्यो । यसैले पनि होला मलाई खेलप्रति माया बसेको ।
सुनार अहिले बुटवलको कालिका मानव माध्यमिक विद्यालयमा अध्ययनसँगै खेल जीवनलाई पनि अगाडी बढाईरहेका छन् । पहिले गाउँमा दाईहरू खेलेको देखेर सिकेका उनलाई अहिले शिक्षकले प्रोत्साहन गर्दे खेल्न उत्साहित गराइरहेका छन् । गाँउमा फुर्सदमा रमाईलोका लागि खेले पनि अहिले व्यवसायिक रूपमा नै खेल सिकिरहेका सुनारलाई राष्ट्रिय खेलाडी बन्ने रहर छ । राष्ट्रका लागि खेल्ने धोको छ । उनी भन्छन्, देशका लागि खेलिरहेका खेलाडी देख्दा म आफूलाई देखिरहेको हुन्छु । यो मेरो सपनामा म मात्रै होईन मेरो परिवार र विद्यालय परिवारको पनि सपना जोडिएको छ । सुनारले अहिले सम्म आफू सहभागी भएको पालिकास्तरीय भलिबल र राष्ट्रपति रनिङ्गशिल प्रतियोगितामा प्रथम उपाधि जितिसकेका छन् ।
बुटवल चरङ्गेकी भुमिका दिशामगर तेक्वान्दो खेलाडी हुन् । आफनो सुरक्षाका लागि भनेर तेक्वान्दो सिकेकी उनलाई अहिले यो खेल अति प्रिय लाग्छ । उनी भन्छिन् यो खेलबाट धेरै कुराहरू सिक्न पाए त्यो महŒवपूर्ण पाटो हो । शुरुमा जसरी सामान्य लिए त्यो भन्दा बेग्लै रहेछ । अहिले त यो खेल नशा जस्तै भएको छ ।
शुरु बुवा आमाले कम्तिमा छोरी आफ्नो सुरक्षा गर्न सकोस् भनेर खेल्न पठाउनु भएको हो तर यहाँ आफनो सुरक्षा मात्र होईन खेलका हरेक पक्षले जीवनलाई नै सुरक्षित बनाइरहेको छ । यहाँ अनुशासनका कुरा पनि छन् । त्योसँगै खेलले बिस्तारै बेग्लै पहिचान समेत बनाउन थालेको अनुभुति हुँदैछ मलाई । मगर अहिले बुटवलको कालिकामानव माध्यमिक विद्यालयको कक्षा ८ मा अध्ययरत छिन् ।
कालिका माध्यमिक विद्यालयको कक्षा ९ मा पढ्ने सुमित जिसी कबड्डीका खेलाडी हुन् । सानैमा गाँउघरमा साथी भाई मिलेर रमाईलोका लागि आफूहरू खेल्ने खेल भएकाले पनि सुमितका लागि यो खेल प्राथमिकतामा परेको बताए । सानोमा खेलेको खेललाई अहिले विद्यालयमा खेल्न पाउँदा खुशी लागेको छ विद्यालयमा कवड्डी खेललाई प्राथमिकतामा राखेर खेल्ने अवसर राम्रो पक्ष हो ।
यो खेलप्रति सुमित जस्तै धेरै खेलाडीको झुकाव रहेको छ । कबबडी खेलको गाँउदेखि राष्ट्रिय स्तरसम्म चर्चा छ । त्यसैले पनि यो खेलप्रति धेरैको रुची बढेको सुमितको भनाई छ ।
करुणा गाहामगर भलिबल खेलाडी हुन् । पाल्पाको रिब्दीकोटकी मगर कक्षा १० मा अध्यन्न गर्दछिन् । भलिवल आफ्नो रोजाईको खेल त्यस माथि परिवारको साथ, सहयोग र विद्यालयले खेललाई प्राथमिकतामा राख्नु पनि राम्रो पक्ष भएको बताईन । गाँउमा दाईहरू खेलेको देखदा खेल्न मन लाग्दथियो तर खेल्न पाएनन् यहाँ आएपछि विद्यालयमा नै पढाईसँगै भलिबल खेल्न पाउदा अत्यन्त खुशी लागेको गाहा मगरले सुनाईन ।
कालिका मानव माध्यमिक विद्यालयका खेल प्रशिक्षक हरिस वलीले विद्यालयमा खेल प्रति रुचि राख्ने विद्यार्थी र अभिभावक दुबैका कारण नै विद्यालयले खेललाई प्राथमिकतामा राखेको बताए । उनले पछिल्लो समयमा खेलकुद अत्यन्त अनिवार्य भएकाले पनि विद्यालयमा प्रशिक्षकको व्यवस्था नै गरेर विद्यार्थीहरूलाई खेलकुदमा अगाडी सारिएको बताए । उनले विद्यालयमा विद्यार्थीको रुचि अनुसार कक्षागत छनोट गरे पछि विशोष कक्षामा खेलकुद सम्बन्धी अध्ययन गराउने बताए । विहान ६ बजेदेखि ७ः३० सम्म र साझ ४ः ३० बाट ६ बनेसम्म खेल कक्षा सञ्चालन हुन्छ । अहिले यस विद्यालयमा १ सय ८४ जना विद्यार्थीहरूले खेल कक्षामा सहभागिता जनाईरहेका छन् । यहाँ ९० जना छात्राको सहभागिता रहेको विद्यालयका खेल प्रशिक्षक वलीले बताए । उनले यसै विद्यालयका विद्यार्थी सलिन देवान लङ्गजम्प राष्ट्रिय कृतिमान राखेको भन्दै खुशी व्यतm गरे ।
उनले अहिले यस विद्यालयलमा भलिबल, एथलेटिक्स, कबवड्डी, तेक्वान्दो खेलमा प्रशिक्षकको व्यवस्था सहित अध्ययन भइरहेको छ । यस विद्यालयमा खेल अध्ययन गरेका मध्ये १ जना भलिबल, कबवडीमा ७ जना, तेक्वान्दोमा ३ जना र करातेमा १ जना विद्यार्थी राष्ट्रिय खेलाडीको रूपमा परिचित भइसकेको वलीले जानकारी दिए ।
विद्यालयका प्रधानाध्यापक दिनेश थापाले पढाईसँगै खेल पनि अति आवश्यक पर्ने भएकाले विद्यालयले खेल शिक्षालाई प्राथमिकतामा राखेको बताए । उनले विद्यार्थीहरूका फरक फरक रुचि हुने भएकाले पनि विद्यालयले विधागत अध्यापनलाई जोड दिएको हो । उनी भन्छन्, पछिल्लो समयमा खेललाई हेर्न नजर अत्यन्त सकारात्मक छ । त्यसैले पनि हामी शिक्षकहरूको व्यवस्था नै गरेर विद्यार्थीहरूलाई अतिरिक्त समयमा खेलकुदका विषय अध्यापन गराएका छौ । यसले विद्यार्थीको चाहनालाई प्रोत्साहन गरेको छ ।
साभार . बुटवल टुडे