लस एन्जलस, क्यालिफोर्नियामा फैलिएको डढेलोले व्यापक विनाश गरेको छ । हालसम्म १ हजार १ सयभन्दा बढी घर जलेर नष्ट भएका छन् भने पाँचजनाले ज्यान गुमाएका छन्
अमेरिकी अधिकारीहरूले यो डढेलोलाई पछिल्ला वर्षहरूमा सबैभन्दा विनाशकारी भन्दै चिन्ताजनक अवस्था घोषणा गरेका छन् । डढेलो प्यासिफिक प्यालिसेड्स क्षेत्रबाट मंगलबार बिहान सुरु भएको थियो । यो क्षेत्र सान्टा मोनिका पहाडमा पर्ने एक प्रसिद्ध पर्यटकीय गन्तव्य हो । हावाको तीव्र वेगका कारण आगो चाँडै फैलिएको र नियन्त्रणमा ल्याउन कठिन भएको जनाइएको छ ।
क्यालिफोर्नियाका गभर्नर गेभिन न्युजमले खतराको गम्भीरता औंल्याउँदै सो क्षेत्रमा आपतकाल घोषणा गरेका छन् । उनले भने, ‘डढेलोले कसैलाई पनि सुरक्षित छोडेको छैन ।’ डढेलोको फैलावटलाई रोक्न सशक्त प्रयास गरिए पनि हावाको ९७ किलोमिटर प्रतिघण्टाको वेगले यसलाई झन् भयानक बनाएको छ । आगामी दिनमा हावाको गति १६० किलोमिटर प्रतिघण्टासम्म पुग्न सक्ने चेतावनी दिइएको छ ।
मानवीय र भौतिक क्षति ३० हजारभन्दा बढी व्यक्ति विस्थापित भएका छन् ।
आवश्यक सेवा बन्द २८ हजारभन्दा बढी घरमा विद्युत् सेवा अवरुद्ध भएको छ । विद्यालयहरू पनि बन्द गरिएको छ ।
प्राकृतिक विनाश झन्डै १६ हजार एकड जमिनमा आगोले क्षति पुर्याएको छ ।
फायरफाइटरहरू पाँच वटा हेलिकप्टर र दमकलको सहायताले डढेलो नियन्त्रणको प्रयासमा जुटेका छन् । तर हावाको तीव्र गति र सुकेका रुखपात तथा सान्टा आना आँधीका कारण आगो निभाउन कठिन भइरहेको छ ।डढेलो अनियन्त्रित भएपछि जोखिम क्षेत्रबाट मानिसहरू भागाभाग गर्न बाध्य भएका छन् । सडकमै गाडी छाडेर भागेका कारण कतिपय स्थानमा बाटो खुलाउन डोजर प्रयोग गर्नुपरेको छ ।
