दक्षिण अफ्रिकाको सुनको खानीमा फसेका १०० भन्दा बढी कामदारको मृत्यु भएको छ।
अन्तर्राष्ट्रिय सञ्चारमाध्यमका अनुसार खानीमा दुई महिनादेखि ४०० भन्दा बढी कामदारहरू थुनिएका थिए। उनीहरू सबै अवैध रूपमा सुन उत्खनन गर्न खानीमा प्रवेश गर्ने क्रममा उनीहरू थुनिन पुगेका थिए।ठूलो संख्या खानी मजदूरको मृत्युको समाचार बाहिरिएपछि राहत र उद्धारका लागि विशेष खानी उद्धार टोली घटनास्थलमा पठाइएको छ। समाचार अनुसार भोक र तिर्खाका कारण मजदूरको ज्यान गएको भनिएको छ। हालसम्म १३ जनाको शव निकालिएको छ। खासमा उद्धार गरिएका कामदारहरूबाट एउटा सेलफोन भेटिएको थियो, जसमा २ भिडियो भेटिएको थियो। यी भिडियोमा दर्जनौं शव पोलिथिनमा बेरेको देखाइएको छ।खानीमा काम गर्ने मजदुरसँग सम्बद्ध सामाजिक संस्था माइनिङ इफेक्टेड कम्युनिटीज युनाइटेड इन एक्सन ९म्याकुए० का अनुसार प्रहरीले गत नोभेम्बरदेखि अवैध उत्खननविरुद्ध कारबाही थालेको थियो। प्रहरीले यो खानी सिल गर्ने प्रयास गरेको थियो। यसका लागि मजदूरलाई बाहिर आउन आग्रह गरिएको पनि थियो तर पक्राउ पर्ने डरले कामदारहरूले खानीबाट बाहिर निस्कन मानेनन्। त्यसयता ती मजदूरहरू लामो समयदेखि खानीमा नै फस्न पुगेका थिए।मजदूरहरूले अस्वीकार गरेपछि प्रहरीले खानी भित्र पस्न र निस्कन प्रयोग गरिने डोरी र पुली हटाएको मकुआले जनाएको छ। त्यसपछि कामदार खानीमै अलपत्र परेका थिए।दक्षिण अफ्रिकी अखबार सन्डे टाइम्सका अनुसार उद्धार टोलीले एउटा पिंजरा तयार पारेको छ, जसलाई खानीमा ३ किलोमिटर तल झर्ने काम भइरहेको छ। यो पिंजराको सहायताले पहिले बाँकी रहेकालाई बाहिर निकाल्ने काम भइरहेको जनाइएको छ। फसेका मजदूरलाई बाहिर निकाल्नका लागि कम्तिमा १६ दिन लाग्ने अङ्कलन गरिएको छ।