लुदस, लवनी
कपिलवस्तु जिल्लाको शुद्धोधन गाउँपालिकाको लबनीमा पोषणको अवस्थामा सुधार ल्याउन खाद्य प्रणालीको पोषिलो खाना प्रदर्शनी मेला २०८१ आयोजना गरिएको छ ।
डब्लुएचएच, फरवार्ड नेपाल तथा कालिका स्वाबलम्बन सामाजिक केन्द्रले सञ्चालन गरेको सुधारीएको खाद्य प्रणाली कार्यक्रमको सहयोगमा शुद्धोधन गाउँपालिकाको कार्यालयले मेला आयोजना गरेको हो ।
२२ वटा स्थानीय पोषण सुधारका सचेतनामुलक सामग्री सहितको स्टल राखिएको मेलामा जनकल्याण युवा क्लब, शुद्धोधन किशोर किशोरी सञ्जाल र शुद्धोधन युवा क्लवले सहआयोजकको भूमिका निर्वाह गरेका थिए ।
स्टलहरूमा स्थानीय खानाका परिकार, पोषणमा सुधार ल्याउने पोषण बगैंचामा उत्पादन गर्न सकिने तरकारी र फलफुल, जियो कृषि डिजिटल कृषि तथा पशु परामर्श सेवा, दुग्ध जन्य उत्पादन, स्थानीय कृषि उत्पादन र स्वास्थ्य सेवा सामाग्रीको प्रदर्शनी गरिएको थियो । स्थानिय परिकार तर्फ कालानमक चामलको खिर, सातु भेली, रामदानाको लड्डु, फारा, ढिकरी, कर्कलोको पकौडा (रिकोच), कोदोको सेलरोटी, जैविक बिषादी बनाउने उपाय, माछा र कुखुरा पालन बारेको प्रदर्शनी र सचेतना प्रवाह गरिएको थियो ।
स्थानीय सामग्रीको उत्पादन र उपभोग गरि पोषणको अवस्थामा सुधार ल्याउन सहयोग पुर्याउने उद्देश्यले मेला आयोजना गरिएको डब्लु एचएच कालिका तर्फबाट सुधारीएको खाद्य प्रणाली कार्यक्रमकी संयोजक कमला सापकोटाले जानकारी दिईन । आफ्नै उत्पादन, आफ्नै परिकार भन्ने नारालाई प्रबद्र्धन गरि आफ्नै श्रोत साधनमै पोषणको अवस्था सुधार्न सकिने बिषयमा सचेतना प्रवाहमा मेला सहयोगी हुने उनको भनाई थियो ।
सरसफाई र पोषणमा ध्यान दिन सके स्वास्थ्यका धेरै समस्या समाधान हुने भएकाले समुदायमा सचेतना आवश्यक रहेको लुम्बिनी प्रदेशसभा सदस्य मुधुसुदनशरण चौधरीले बताए । जैविक मलको प्रयोग गरि बिषादीरहित उत्पादनमा ध्यान दिन आवश्यक रहेको जिल्ला समन्वय समिति प्रमुख बाबुराम आचार्यको भनाई थियो । खानपानमा सुधार गर्न सकिए पोषणको अवस्थामा समेत सुधार आउने शुद्धोधन गाउँपालिकाका प्रमुख कमलेश शरण चौधरीले बताए ।
कार्यक्रममा युवा क्लबका सदस्यहरूले सडकनाटक सहितका सचेतनामुलक कार्यक्रम प्रदर्शन गरेका थिए । यस्ता किसिमका कार्यक्रमले ग्रामिण क्षेत्रमा सचेतनाका साथै शारिरिक विकासमा महत्वपुर्ण टेवा पुग्ने जनकल्याण युवा क्लवका अध्यक्ष पृथ्वीराज चौधरीले बताए कार्यक्रमका महत्वपुर्ण अंश लुम्बिनी दर्पणबाट प्रत्यक्ष प्रशारण समेत गरिएको थियो ।
