हरि आचार्य, कपिलवस्तु
पछिल्लो समय जन्म दिनको अवसरमा विभिन्न होटल तथा रेष्टुरेण्टहरुमा फजुल खर्च गर्ने प्रवृति बढिरहेको पाईन्छ । पश्चिमेली संस्कृति अनुसरण गरि जन्म दिनमा केक काट्ने साथीभाईहरुलाई डाक्ने अनि नाँचगान गरी रमाईलो गर्ने प्रचलन पनि नभएको होईन । सोहि क्रममा जन्म दिनमा केक काट्ने, रमाईलो गर्ने जस्ता प्रवृत्तिलाई अन्त्य गर्नका लागि एक एक व्यवसायीले जन्मोत्सवको अवसरमा रक्तदान कार्यक्रमको आयोजना गर्नुका साथै गुरुकुलमका बटुकहरुलाई खाद्यान्न तथा सरफ प्रदान गरि उदाहरणिय कार्य गर्नुभएको छ ।
कपिलवस्तुको बाणगंगा नगरपालिका वडा नं. ४ निवासी उद्योग व्यापार संघ कपिलवस्तुका अध्यक्ष खिमानन्द पौडेल (कोपिल) ले जन्मोत्सवको अवसरमा गर्नुभएको रक्तदान कार्यक्रममा १६ प्वाईन्ट रगत संकलन भएको हो ।
कपिलवस्तुको बाणगंगा–४, सिद्धिपुरमा आयोजित रक्तदान कार्यक्रममा १६ प्वाइन्ट रगत संकलन भएको छ । ‘रक्तदान जीवनदान’ भन्ने मूल नाराका साथ उद्योग व्यापार संघ कपिलवस्तुका कोपिलको जन्मदिनको अवसरमा खुल्ला रक्तदान कार्यक्रम आयोजना गरिएको थियो । रक्तदान कार्यक्रम रक्त संचार सेवा केन्द्र, उपशाखा बाणगंगा कपिलवस्तुको प्राविधिक सहयोग तथा उद्योग व्यापार संघ कपिलवस्तुका अध्यक्ष पौडेलको व्यवस्थापनमा सम्पन्न भएको हो । रक्तदान कार्यक्रमलाई सफल पार्न विभिन्न संघ संस्थाका प्रतिनिधि, राजनैतिक दलका प्रतिनिधि तथा समाजसेवी लगायतको उपस्थिति रहेको थियो ।
संघका अध्यक्ष खिमानन्द पौडेल (कोपिल) ले जन्म दिनको अवसरमा हरेक बर्ष विभिन्न सामाजिक कार्य गर्दै आएको बताउदै रगतको माग दिनानुदिन बढ्दै गईरहेको परिपेक्षमा रगतको मागलाई परिपुर्ती गर्नका लागि रक्तदान कार्यक्रम राखिएको जानकारी दिनुभयो ।
यता मनकामना संस्कृत विद्यापिठ गुरुकुलम नन्दगरमा बटुकहरुलाई खाद्यान्न तथा लुगा धुने सरफ वितरण गर्दै उहाँले गुरुकुल संञ्चालनका लागी प्रत्येक बर्ष महायज्ञको आयोजना गरी खर्च व्यवस्थापन गर्नुपरेको र सरकारी तथा गैरसरकारी निकायबाट कुनै पनि आर्थिक सहयोग प्राप्त नभएका कारण गुरुकुलमलाई सहयोग गर्न आग्रह समेत गर्नुभयो । अध्यक्ष पौडेलले जन्म दिनमा अनावश्यक खर्च नगरि सामाजिक कार्य गर्न समेत सम्पुर्णलाई अनुरोध गर्नुभयो ।
त्यस्तै अध्यक्ष पौडेलले संयुक्त एम्बुलेन्स चालक संघ नेपाल ट्रेड युनियन संघ जिल्ला शाखा कपिलवस्तुलाई १७ थान वाटरप्रुफ ज्याकेट (विन्ड चिटर) संघका अध्यक्ष कमल घिमिरेलाई हस्तान्तरण समेत गर्नुभएको हो ।
