उपत्यका विकास प्राधिकरणका एक अमिन (करार) माथि तीन करोडभन्दा बढी भ्रष्टाचार गरेको आरोप लागेको छ । अख्तियार दुरुपयोग अनुसन्धान आयोगले प्राधिकरणको बागमती नगर जग्गा एकीकरण आयोजना (गौरीघाट)मा कार्यरत अमिन दिनेशप्रसाद यादवविरुद्ध आज विशेष अदालतमा मुद्दा दायर गरेको छ । उनले तीन करोड २९ लाख ४५ हजार बराबरको सम्पति गैरकानुनी ढंगले आर्जन गरेको अनुसन्धानबाट खुलेको बताइन्छ ।

२०६३ भदौदेखि गत असारसम्म यादवको आम्दानी र खर्च अनुसन्धान गर्दा पारिश्रमिक, भत्ता, नागरिक लगानी कोष, आवास कर्जा, कृषि आम्दानी, सवारी र अचल सम्पत्ति बिक्री, सापटी तथा बैंकको ब्याजबाट कुल दुई करोड ४२ लाख वैध आय गरेको भेटिएको आयोगका प्रवक्ता राजेन्द्रकुमार पौडेले जानकारी दिए । सोही अवधीमा यादवले घर निर्माण, गहना, जग्गा खरिद, सवारी साधन, शैक्षिक खर्च, ऋण सापटी, सामाजिक खर्चलगायत शीर्षकमा कुल पाँच करोड ७१ लाख ६६ हजार खर्च गरेको देखिन्छ । झण्डै साढे तीन करोड बराबरको सम्पतिको स्रोत पुष्टि नभएको आयोगको ठहर छ ।

गैरकानुनी रुपमा आर्जन गरेको सम्पति र त्यसबाट बढे÷बढाइएको सम्पत्ति उनले श्रीमती अमृताकुमारी यादवको नाममा समेत राखेको अख्तियारले जनाएको छ ।