तौलिहवा । राष्ट्रिय जनमोर्चा कपिलवस्तुले जिल्लाको सदरमुकाम तौलिहवामा भोली वृहत र्याली सहित सभाको आयोजना गर्ने जनाएको छ । जस अन्तरगत हिजो चार ठाउँमा सभा सम्पन्न गरेको छ ।
प्रतिगामी खतराको विरोध गर्दै २०८२ वैशाख २० गतेबाट विभिन्न कार्यक्रमहरु गर्दै आएको थियो । सप्ताह व्यापी कार्यक्रम गरेर भोली सदरमुकाममा सभाको आयोजना गरि सम्पन्न गर्ने जिल्ला अध्यक्ष राम प्रसाद बेल्वासेले जानकारी दिनुभयो
हिजो भएको कार्यक्रम अर्न्तरगत जिल्लाको कृष्णनगरमा सम्पन्न सभालाई सम्बोधन गर्दै राजामो कपिलवस्तुका सचिव केरसिंह अदैले नेपालमा अब पारिवारिक राजतन्त्र नचल्ने बताउनु भयो ।
उहाँले राष्ट्रिय जनमोर्चाले सङ्घीयता विदेशी चलखेलबाट आएको हो भन्ने दाबीलाई अमेरिकी राष्ट्रपति डोनाल्ड ट्रम्पले प्रमाणित गरिदिएको बताउनुभयो ।
सो सभाको सञ्चालन राजमो कपिलवस्तुका कोषाध्यक्ष केहरसिंह पुनले गर्नुभएको थियो ।
बहादुरगञ्जको सभा लाई मूल प्रवाह अखिल भारत नेपाली एकता समाजका केन्द्रीय प्रतिनिधि रामबहादुर विकले सम्बोधन गर्नुभएको थियो ।
नेपालमा राजतन्त्र ल्याउन वर्षौंदेखि राजतन्त्रबाट स्वार्थ लिएका, जमिन्दार वर्ग र नबुझेका युवाले प्रचार गरेको बताउँदै उहाँले नेपाली जनता सचेत हुनुपर्ने आवश्यकतामा जोड दिनुभयो ।
उक्त कार्यक्रमको सञ्चालन पनि राजमो कपिलवस्तुका कोषाध्यक्ष केहरसिंह पुनले गर्नुभएको थियो ।
शिवराज नगरपालिकाको रुद्रपुरचोकमा भएको सभालाई राजमो कपिलवस्तुका कोषाध्यक्ष केहरसिंह पुनले सम्बोधन गर्नुभएको थियो भने सञ्चालन मूल प्रवाहका नेता रामबहादुर विकले गर्नुभएको थियो ।
त्यसैगरी, विजयनगरको फरेनीचोकमा सम्पन्न सभालाई राजमो कपिलवस्तुका सचिव केरसिंह अदै र मूल प्रवाहका प्रतिनिधि रामबहादुर विकले सम्बोधन गर्नुभएको थियो ।
कार्यक्रमको सञ्चालन केहरसिंह पुनले गर्नुभएको थियो ।
