✍️ नेत्र पान्डे, पाल्पा
तानसेन, पाल्पा — युनाइटेड मिसन अस्पताल, तानसेनको बाहिरी क्षेत्रमा रहेका पसलहरूमा म्याद गुज्रेका खाद्य सामग्री जस्तै चाउचाउ, बिस्कुट, जुस आदि सहजै पाइने अवस्था देखिएको थियो। सो विषयमा बिरामीका कुरुवा तथा सामान्य नागरिकहरूले चासो व्यक्त गर्दै सम्बन्धित निकायको ध्यानाकर्षण गराएका थिए।
पढ्न लेख्न नसक्ने बिरामी तथा कुरुवाहरूले म्याद हेर्न नसक्दा स्वास्थ्यमा असर पर्ने सम्भावना बढेको भन्दै, सो समस्या प्रमुख जिल्ला अधिकारी टय नारायण सुवेदी मो। ९८५७०५७७७७० समक्ष जानकारी गराइएको थियो।
सूचना प्राप्त भएको छोटो समयमै जिल्ला प्रशासन कार्यालय, पाल्पाको समन्वयमा सम्बन्धित निकायद्वारा बजार अनुगमन तथा निरीक्षण कार्य सम्पन्न गरिएको छ। अनुगमन टोलीले अस्पताल क्षेत्र आसपासका पसलहरूमा रहेका म्याद गुज्रेका खाद्य सामग्री हटाएको पुष्टि भएको छ।
यो कार्यले युनाइटेड मिसन अस्पताल क्षेत्रमा आउने बिरामी र कुरुवाहरूका लागि स्वस्थ र सुरक्षित वातावरणको प्रत्याभूति दिलाएको छ।
नियमित अनुगमनको खाँचो
प्रमुख जिल्ला अधिकारी सुवेदीज्यूको सक्रियता र जनताको आवाजप्रति चाँडो प्रतिक्रिया सर्वसाधारणको हितमा गरिएको सराहनीय कदम हो। यस्ता अनुगमन कार्यहरू ३–३ महिनाको अन्तरालमा नियमित रूपमा सञ्चालन गरिए, अस्पताल क्षेत्र वरपर अझ सुरक्षित, स्वच्छ र उपयुक्त वातावरण निर्माण हुने जनताको अपेक्षा रहेको छ।
यस क्रममा युनाइटेड मिसन अस्पताल प्रशासनले पनि सरोकार देखाउँदै सहयोग पुर्‍याएकोमा धन्यवादयोग्य छ। अस्पताल परिसरमा हुने गतिविधिहरूमा जिम्मेवारीपूर्वक समन्वय गर्नु स्वास्थ्य सेवामा विश्वास वृद्धि गर्ने महत्वपूर्ण पक्ष हो।