अहमदाबाद विमान दुर्घटनामा विमानका पाइलट सुमित सभरवालले एयर ट्राफिक कन्ट्रोलर (एटीसी) लाई पठाएको अन्तिम सन्देशको खुलासा भएको छ। ४–५ सेकेन्डको सन्देशमा, सुमितले भनेका थिए, ‘मेडे, मेडे, मेडे…मैले थ्रस्ट पाइरहेको छैन। पावर घट्दैछ, विमान उठिरहेको छैन। हामी बाँच्दैनौँ होला ।’
भारतको नागरिक उड्डयन मन्त्रीले शुक्रबार अहमदाबादमा भएको एयर इन्डियाको विमान दुर्घटनास्थलमा ब्ल्याक बक्स फेला परेको बताएका छन्। भारतको विमान दुर्घटना अनुसन्धान ब्युरोले २८ घण्टाभित्र उडान डेटा रेकर्डर बरामद गरेको राम मोहन नायडू किन्जारापुले पुष्टि गरे।
‘ब्ल्याक बक्सको पुनः प्राप्ति अनुसन्धानमा एक महत्त्वपूर्ण कदम हो र यसले विपत्तिको अनुसन्धानलाई उल्लेखनीय रूपमा मद्दत गर्नेछ,’ किन्जारापुले भने।
२७५ जनाको मृत्यु
दैनिक भास्करका अनुसार हालसम्म दुर्घटनामा मृत्यु हुनेको सङ्ख्या २७५ पुगेको छ । सिभिल अस्पतालमा २७० भन्दा बढी शवको पोस्टमार्टम गरिएको छ। यसबाहेक २४१ जनाको डीएनए नमुना लिइएको छ भने ७ वटा शवको पहिचान भइसकेको छ।
मृत्यु हुनेमा विमानमा सवार २४१ जना रहेका छन् । विमानमा २४२ जना रहेकोमा एक जना यात्रु मात्र बाँचेका छन् । त्यस्तै बीजे मेडिकल कलेज होस्टेलमा ३१ जनाको मृत्यु भएको छ । यसमा ५ जना डाक्टर, अन्य कर्मचारी र उपस्थित अन्य रहेका छन् ।
विमान दुर्घटनाग्रस्त भएको बीजे मेडिकल कलेजको होस्टेल भवनमा ६० भन्दा बढी डाक्टर, विद्यार्थी, कर्मचारी र केही अन्य व्यक्तिहरू उपस्थित थिए। लण्डनबाट अहमदाबाद आउँदै गरेको विमान शनिबार दिउँसो ४ बजे अवतरण हुनेछ। मृतकका परिवारका सदस्य र आफन्तहरू त्यसमा आउँदैछन्। त्यसपछि उनीहरूको डीएनए नमुना लिन बाँकी छ।
यता, इन्डियन मेडिकल एसोसिएसन (आईएमए) को गुजरात शाखाले टाटा सन्सका अध्यक्ष एन. चन्द्रशेखरनलाई पत्र लेखेको छ। आईएमएले ज्यान गुमाएका यात्रुका परिवारलाई १ करोड भारतीय रुपैयाँ क्षतिपूर्ति दिने र बीजेएमसी कलेज होस्टेलको मर्मतसम्भारमा सहयोग गर्ने घोषणाप्रति आभारी रहेको बताएको छ।
होस्टेलमा भएको विमान दुर्घटनामा मृत्यु भएका वा घाइते भएका विद्यार्थीहरूका लागि आर्थिक सहयोगको पनि अपेक्षा गरिएको छ।
