सांसद पदबाट निलम्बन भइसकेका व्यक्ति रवि लामिछानेलाई अझै पार्टीको सभापति राखेको भन्दै सत्ता रुढ दल नेपाली कांग्रेसले कटाक्ष गरेको छ। आइतबार प्रतिनिधिसभा बैठकको आकस्मिक समयमा बोल्दै कांग्रेस प्रमुख सचेतक श्याम घिमिरेले सहकारी ठगी प्रकरणमा जेल गइसकेका व्यक्तिलाई रास्वपाले सभापति र संसदीय दलको नेता बनाएको भन्दै कटाक्ष गरेका हुन्।
पाँच/पाँचवटा अदालतमा सहकारी ठगी, सम्पत्ति शुद्धिकरण एवं संगठित अपराधको मुद्दा खेपिरहेका र सर्वोच्च अदालतले थुनामा राखी पुर्पक्षका गर्न आदेश दिएका लामिछानेलाई आफ्नो पार्टीको सभापतिको पदमा विराजमान गरेको भन्दै टिप्पणी गरे।

‘निर्वाचन आयोगको सूचीमा रास्वपाको सभापतिको पदमा रवि लामिछाने जो जेलमा हुनुहन्छ उहाँ नै अहिले पनि निर्वाचन आयोगको अभिलेखमा सभापतिको पदमा हुनुहुन्छ। त्यति मात्रै होइन रास्वपाको संसदीय दलको नेता परिवर्तन भएको खबर बाहिरिएको छैन। संसद सचिवालयमा अहिले पनि रास्वपाको संसदीय दलको नेता रवि लामिछाने नै हुनुहुन्छ जो संसद पदबाट निलम्बन भइसकेका छन्। त्यही व्यक्ति पनि आफ्नो संसदीय दलको नेता राखेर बस्ने पार्टीले अरुलाई नैतिकताको पाठ सिकाउनु कतिको जायज हो,’उनले भने,’त्यो पार्टीले अहिले नैतिकताको पाठ अरुलाई सिकाउन मिल्छ, कि मिल्दैन ? ‘

उनले अरुसँग नैतिकता खोज्नेहरूले आफैभित्रबाट नैतिकताको उदाहरण प्रस्तुत गर्न आग्रह गरे । भिजिट भिसा प्रकरणमा गृहमन्त्री रमेश लेखकको राजीनामा मागेर संसद बैठक अवरुद्ध गर्नु औचित्यहीन भएको उनको भनाइ।

विपक्षी दल राप्रपा र रास्वपाको अवरोधका बीच सभामुख देवराज घिमिरेले बैठक अगाडि बढाएका छन्। अहिले आर्थिक वर्ष २०८२/०८३ को बजेटमाथिको छलफल जारी छ। अर्थमन्त्री विष्णुप्रसाद पौडेलले संसदमा बजेट प्रस्तुत गरेसँगै छलफल सुरू भएको हो।