इरानमा अमेरिकाले गरेका हवाई आक्रमणबाट त्यहाँका प्रमुख परमाणु भट्टीहरू पूर्ण रूपमा ध्वस्त नभएको प्रारम्भिक गुप्तचर मूल्यांकनले देखाएको छ।
अमेरिकी डिफेन्स इन्टेलिजेन्स एजेन्सी (DIA) को मूल्यांकन अनुसार, फर्दो, नतान्ज र इस्फहानमा रहेको इरानको परमाणु पूर्वाधारमा आंशिक क्षति पुगेको छ तर संरचनाहरू पूर्ण रूपमा नष्ट भएका छैनन्।
रोयटर्स र सिएनएन ले पेन्टागनका उच्च स्रोतहरूलाई उद्धृत गर्दै जनाएअनुसार अमेरिकी राष्ट्रपति डोनाल्ड ट्रम्प र रक्षामन्त्री पिट हेगसेथको दाबी— जसअनुसार इरानको परमाणु कार्यक्रम ‘पूर्ण रूपमा ध्वस्त’ भएको भनिएको थियो— त्यसको खण्डन हुने प्रारम्भिक तथ्याङ्कहरू सार्वजनिक भएका छन्।
DIA का एक अधिकारीका अनुसार, “इरानले परमाणु कार्यक्रमहरू गहिरो भूमिगत संरचनामा सञ्चालन गरिरहेको हुँदा बाह्य आक्रमणबाट व्यापक क्षति हुन सकेन।”
सिएनएनले जनाएअनुसार, फर्दोस्थित भूमिगत परमाणु केन्द्रमा अमेरिकी आक्रमणले मुख्यत: प्रवेशद्वारमा क्षति पुर्याएको छ, तर युरेनियम भण्डारण र भित्री संरचनामा अपेक्षित क्षति पुगेको छैन।
पेन्टागन स्रोतले हमलाअघि नै इरानले युरेनियम र संवेदनशील उपकरणहरू अन्यत्र सारिसकेको जानकारी पनि दिएको छ। मक्सर टेक्नोलोजिजको स्याटलाइट तस्वीरले हमलाअघि फर्दो प्रवेशद्वारमा धेरै संख्यामा ट्रक देखिएको पुष्टि गर्दछ।
ट्रम्प र हेगसेथले भने अमेरिकाले प्रयोग गरेका १२ वटा GBU-57 बंकर भेदी बमहरूका कारण फर्दो पूर्ण रूपमा ध्वस्त भएको दाबी गर्दै आएका छन्। GBU-57 बमहरू विशेष रूपमा जमिनमुनिका संरचनाहरू ध्वस्त पार्न प्रयोग गरिन्छ।
यद्यपि गुप्तचर निकायको प्रारम्भिक निष्कर्षअनुसार इरानको आणविक कार्यक्रम दुईदेखि पाँच वर्ष होइन, अधिकतम एकदेखि दुई महिनामात्रै पछाडि धकेलिएको हो।
ह्वाइट हाउसकी प्रेस सेक्रेटरी क्यारोलिन लेभिटले भने प्रारम्भिक मूल्यांकनको सार्वजनिक हुनुलाई ‘गोप्य सूचनाको लिक’ भन्दै विरोध गरेकी छन्। उनले यसलाई राष्ट्रपति ट्रम्प र अमेरिकी सेनाको क्षमतामाथिको अवमूल्यनको प्रयास भनेकी छन्।
इरानी प्रतिक्रिया स्वरूप कतार र इराकस्थित अमेरिकी सैन्य संरचनाहरूमा मिसाइल आक्रमण भएको थियो।
१२ दिन लामो द्वन्द्वपछि मंगलबार इरान र इसराइलबीच युद्धविराम घोषणा गरिएको छ। युद्धविराम अमेरिकी राष्ट्रपति ट्रम्पकै पहलमा भएको बताइएको छ।
यस अवधिमा ६१० जना इरानी र २८ जना इसरायली नागरिकको मृत्यु भएको अन्तर्राष्ट्रिय सञ्चारमाध्यमहरूले जनाएका छन्।
