लुदस, कपिलवस्तु
कपिलवस्तु जिल्लाको बाणगंगा नगरपालिकामा खानेपानी तथा सरसफाईका विषयमा सञ्चारकर्मी र सरोकारवालाबीच अन्तरसंवाद कार्यक्रम सम्पन्न भएको छ । सञ्चारिका समूह लुम्बिनी प्रदेश र सहरी विकास तथा खानेपानी मन्त्रालय लुम्बिनी प्रदेशको संयुक्त आयोजनामा कार्यक्रम सम्पन्न भएको हो ।
कार्यक्रममा खानेपानी तथा सरसफाई कार्यालय कपिलवस्तुका प्रमुख प्रकाश केसीले कपिलवस्तुमा खानेपानी तथा सरसफाईको अवस्थाबारे प्रकाश पार्नुभएको थियो । उहाँले जिल्लाभित्र सञ्चालित खानेपानी तथा सरसफाईका योजना, चुनौति र सुधारका प्रयासबारे जानकारी दिनुभयो ।
नेपाल पत्रकार महासंघ कपिलवस्तुका पूर्व उपाध्यक्ष हरि अधिकारीले “प्रदेश सरकारले अघि सारेको ’एक घर, एक धारा’ अभियानको कार्यान्वयन अवस्था बुझ्न आवश्यक रहेको बताउनुभयो ।
कार्यक्रममा सञ्चारिका समूह लुम्बिनी प्रदेशकी अध्यक्ष अमृता अन्मोलले खानेपानी र सरसफाई महिला सम्बद्ध क्षेत्र भएकाले महिला पत्रकारहरूले यस्ता विषयमा खोजमुलक समाचार लेख्न सक्ने प्रशस्त सम्भावना रहेको बताउनुभयो । आयोजना पूरा भयो वा भएन, स्वच्छ खानेपानीको पहुँच र सेवाको गुणस्तर जस्ता विषयमा रिपोर्टिङ गर्न सकिने जानकारी दिनुभयो ।
कार्यक्रमको अध्यक्षता अमृता अन्मोलले गर्नुभएको थियो भने प्रमुख अतिथिका रूपमा प्रकाश केसी र सञ्चालन सञ्चारिका समूह लुम्बिनी प्रदेशकी महासचिव माया केसीले गर्नुभएको थियो । कार्यक्रममा जिल्लाभरका सक्रिय महिला पत्रकारहरूको उल्लेख्य उपस्थिति रहेको थियो ।
अन्तरसंवादले महिला पत्रकारहरूलाई खानेपानी तथा सरसफाईका सवालमा थप जानकार बनाउन र समाचार संकलन तथा लेखनमा प्रेरित गर्ने विश्वास आयोजकले गरेको छ ।
