लुदस,कपिलवस्तु । राष्ट्रिय लोक तथा दोहोरीगीत प्रतिष्ठान नेपाल, लुम्बिनी प्रदेशको आयोजना तथा राष्ट्रिय लोक तथा दोहोरीगीत प्रतिष्ठान नेपाल, जिल्ला कार्यसमिति, कपिलवस्तुको सह-आयोजनामा आयोजित प्रथम लुम्बिनी लोकतारा–२०८३ अन्तर्गतको एकल गायन प्रतियोगिता तथा कपिलवस्तु अडिसन शनिबार गोरुसिङ्गेमा सम्पन्न भएको छ। अडिसनबाट सरोज परियार फाइनल प्रतियोगिताका लागि छनोट हुन सफल भएका छन्।
प्रतियोगितामा सहभागी २७ जना प्रतिस्पर्धीलाई पछि पार्दै परियार उत्कृष्ट घोषित भएका हुन्। प्रतियोगितामा सुनिता सुनार दोस्रो,ओमकार सुनार तेस्रो र चिन्तामणि घिमिरेले सान्त्वना स्थान हासिल गरेका छन्। कार्यक्रममा कपिलवस्तु कला केन्द्रको विशेष नृत्य समेत रहेको थियो। प्रतियोगितामा स्वर, सुर–ताल, प्रस्तुति, अनुशासन तथा भेषभूषालाई मूल्याङ्कनको आधार बनाइएको आयोजकले जनाएको छ।
विश्व संगीत दिवस–२०२६ को अवसर पारेर आगामी असार ७ गते कपिलवस्तुमा आयोजना हुने प्रथम लुम्बिनी लोकतारा–२०८३ लाई लक्षित गर्दै सञ्चालन गरिएको उक्त अडिसनले लोकसंगीतको संरक्षण, प्रवर्द्धन तथा नयाँ प्रतिभाको पहिचानमा महत्वपूर्ण योगदान पुर्याउने अपेक्षा गरिएको प्रतिष्ठान कपिलवस्तुका अध्यक्ष असिम क्षेत्रीले बताए । उक्त ऐतिहासिक कार्यक्रमलाई भव्य रुपमा सफल बनाउन अध्यक्ष क्षेत्रीले सबै पक्षलाई सहयोग र सहभागिताका लागि आग्रह गरेका छन।
कार्यक्रमका प्रमुख अतिथि राष्ट्रिय लोक तथा दोहोरीगीत प्रतिष्ठान नेपाल, लुम्बिनी प्रदेशका अध्यक्ष दामोदर बस्याल रहेका थिए। कार्यक्रममा उपाध्यक्ष नारायण बी.पी. परियार, सह–सचिव तथा कार्यक्रम संयोजक उज्ज्वल गिरी, प्रवक्ता शिव खनाल, प्रदेश सदस्य शकुन्तला गैरे, प्रतिष्ठान कपिलवस्तुका संस्थापक अध्यक्ष पूर्णचन्द्र परियार, पूर्व अध्यक्ष थानेश्वर अधिकारी, निवर्तमान अध्यक्ष शारदा खनाल, सल्लाहकार युवराज भुसाल लगायत विभिन्न व्यक्तिहरुको उपस्तिथि थियो। साथै शिक्षक–शिक्षिका, पत्रकार, अभिभावक तथा स्थानीय सरोकारवालाहरूको उल्लेखनीय सहभागिता रहेको थियो।
कार्यक्रम राष्ट्रिय लोक तथा दोहोरी गीत प्रतिष्ठान नेपाल, कपिलवस्तुका अध्यक्ष असिम कडेल क्षेत्रीको अध्यक्षता, उपाध्यक्ष विनोद रञ्जनको स्वागत मन्तव्य तथा सचिव भक्तिराम घिमिरेको सञ्चालनमा सम्पन्न भएको थियो।
कार्यक्रमलाई सफल बनाउन सहयोग गर्ने सम्पूर्ण सहयोगी, शुभेच्छुक तथा उपस्थित महानुभावहरूप्रति आयोजकले हार्दिक आभार व्यक्त गरेको छ।
