स्वदेशमै केही गरौ भन्ने उदेश्यले कृषिमा सामुहिक लगानी गरेका युवाहरुको सपना बाघले उजाड बनाएको छ । अर्घाखाँचीको एक बाख्रा फर्मका १५ बाख्रा बाघले मारेको छ । जिल्लाको शितगंगा नगरपालिका वडा नम्बर १३ मुस्यान माझिफाँटमा रहेको हिमालयन बाख्रापालन तथा कृषि फर्मका १५ बाख्रा बाघले मारेको हो । बुधबार बाख्रा चराउन जङ्गल जादा एकै दिन ३० बाख्रा हराएका थिए । जसमध्ये १५ बाख्रा फर्ममा आए, ती मध्य एउटा घाइते रहेको र अरु बाख्रा मध्ये ७ बाख्रा बाघले मारेको अवस्थामा विहिबार ५ र शुक्रवार दुईवटा फेला पारिएको फर्मका संचालक घनश्याम अधिकारीले जानकारी दिए । अरु ८ बाख्रा शनिबारसम्म फेला पार्न नसकिएको उनले बताए । बाख्रा हराएपछि लगातार खोजी कार्य गरिरहेको उनले जनाए । तर यतिका दिनसम्म बाख्रा फेला नपर्नूले ती बाख्रालाई पनि बाघले भेटेको उनको आशंका छ । भेटिएका ७ बाख्रा मध्ये ४ बाख्रालाई पछाडीको भागमा क्षति गरेको अरु मारेर छाडेको अवस्था भेटाइएको उनले जनाए । मरेका बाख्रालाई झन्डै एक किलोमिटरमा फेला पारिएको थियो । देउराली–पारे सामुदायिक वन क्षेत्रमा उक्त बाख्रालाई बाघले शिकार बनाएको हो ।
झन्डै दुई बर्ष अगाडि यहाँ बाख्रापालनका लागि १२ लाख लगानी लगाएर संरचना बनाइएको थियो । बाख्रासङ्गै फर्ममा ब्रोइलर कुखुरा र बङ्गुर पनि पालिएको छ । फर्ममा अहिलेसम्म झन्डै ३५ लाख लगानी लगाइएको फर्मका अर्का संचालक बिष्णु पौडेलले बताए । बाघले गर्दा फर्मका ठूलो क्षति पुगेको संचालक पौडेलले गुनासो गरे । गएको जेठ महिनामा २५ सय ब्रोइलर कुखुरा मध्ये एकै दिन १२ सय कुखुरा मरेका थिए । फेरि बाख्रामा ठूलो क्षति पुगेको उनले बताए । अधिकारी लगाएत ५ युवाले संयुक्त लगानी गरि अर्घाखाँचीको शितगंगा १३ मा हिमालयन बाख्रा तथा कृषि फर्म नामबाट एकिकृत कृषिमा लगानी गर्दै आएका थिए । लगातारको क्षतिले फर्म सञ्चालक चिन्तामा छन् । स्वदेशमै केही गर्नूपर्छ भनेर पशुपंक्षीपालनमा लगानी लगाएपनि सोचेजस्तो हुन नसकेको उनले जनाए ।
बाख्रा मारेको अवस्था हेर्दा चितुवा नभएर बघेनी रहेको गाउँले बताउँछन् । चरन क्षेत्रमा गएका बाख्रा केही नभेटिएपछी सोही दिन नै संचालक सहित गाउँलेहरु खोजी कार्यमा निस्कएका थिए । राती अबेर सम्म बाख्रा नभेटिएपछी अर्को दिन खोज्न जादाँ चितुवाले जंगलमा बाख्रा एकाएक एक किलोमिटरको दुरीमा लखेटेर मारेको भेटिएको स्थानीय बाबुराम भाटक्षेत्री बताउछन् । पछिल्लो समय यस क्षेत्रमा बाघको बिगबिगी बढ्दो छ । बुधबार राति मात्र नजिककै भलासिक्र गाउँको एक खोरका ४ बाख्रा जंगली जनावरले मारेको, एक बाख्रालाई घाइते पारेको प्रहरी चौकी सिमलपानीले जनाएको छ ।