कपिलवस्तु,
कपिलवस्तु जिल्लाको दोस्रो ठूलो सुठौली भन्सार कार्यालय डेढ महिनादेखि प्रमुखविहीन रहँदा प्रशासनिक कार्य ठप्पजस्तै बनेको छ । आर्थिक अधिकार नपाएका निमित्तले कार्यालय संचालन त गरिरहेका छन्, तर कर्मचारीहरू भने चालु आर्थिक वर्षको साउनदेखि असोजसम्मको तलबविना बसेका छन्। दसैंजस्तो ठूलो चाडमा समेत उनीहरूले तलब नपाएको गुनासो गरे ।
गत भदौ १८ गते भन्सार प्रमुख नारायण गैरे सरुवा भई बेलहिया भन्सार गएपछी त्यसयता नासु जगत गुरुङले निमित्त प्रमुखको रूपमा कार्यभार सम्हाल्दै आएका छन् । तर, कानुनी रूपमा आर्थिक अधिकार नहुँदा तलब तथा अन्य वित्तीय प्रक्रिया अघि बढ्न सकेका छैनन् ।
लेखा अधिकृत महेन्द्र न्यौपानेका अनुसार कार्यालय अन्तर्गत १२ भन्दा बढी कर्मचारी कार्यरत छन्, जसले तीन महिनादेखि तलब पाएका छैनन्। उनले भने, “आर्थिक अधिकार बिना हामीले तलब दिन सक्दैनौं। प्रमुख नभएसम्म समस्या समाधान हुने देखिँदैन।“
सरुवा भएका प्रमुख अझै अनुपस्थित
त्रिभुवन अन्तर्राष्ट्रिय विमानस्थल भन्सार कार्यालयमा कार्यरत किरण बिष्टलाई सुठौली भन्सारमा प्रमुखका रूपमा सरुवा गरिएको भए पनि उनी अझै कार्यस्थलमा हाजिर भएका छैनन् । भन्सार प्रशासन स्रोतका अनुसार बिष्टले सुठौली आउन आनाकानी गरिरहेका छन्, जसले समस्या झनै गम्भीर बनाएको छ।
प्रमुख जिल्ला अधिकारी दिलकुमार तामाङले यसबारे गम्भीर चासो व्यक्त गरेका छन् । उनले केही दिनअघि भन्सार विभागका उपमहानिर्देशक भरतमणि पाण्डेलाई जानकारी गराइसकेको र भन्सार प्रमुखलाई तत्काल हाजिर हुन निर्देशन दिन आग्रह गरिएको बताए ।
तामाङले भने, “कपिलवस्तुमा राजस्व संकलनको हिसाबले अत्यन्तै महत्त्वपूर्ण मानिने सुठौली भन्सार प्रमुख व्यक्ति ल्याउन पहल भैरहेको बताए ।