कृषि, पर्यटन, उद्योग र खेलकुद क्षेत्रमा लगानी प्रवर्द्धन गर्ने उद्देश्यसहित १६औं कपिलवस्तु महोत्सव तथा कृषि, पर्यटन र औद्योगिक प्रदर्शनी–२०८२ को तयारी तीव्र पारिएको छ। बाणगंगा नगरपालिका–४ जीतपुरस्थित बुद्धरंगशालामा मंसिर १८ गतेदेखि पुस १ गतेसम्म सञ्चालन हुने महोत्सवको नारा “कृषि, उद्योग, पर्यटन तथा खेलकुदमा लगानी, युवाको हातमा सुनौलो बिहानी” राखिएको छ।
महोत्सवको मुख्य आयोजक बाणगंगा वेलफेयर सोसाइटीले आन्तरिक तयारीका कामहरू सम्पन्न गरी अब भौतिक संरचना निर्माणमा केन्द्रित हुने जनाएको छ। शुक्रबार आयोजित पत्रकार सम्मेलनमा सोसाइटीका अध्यक्ष राजकुमार खाँणले महोत्सव कुनै व्यक्तिगत वा प्रतिस्पर्धात्मक स्वार्थ नभई समग्र कपिलवस्तुको पहिचान र समृद्धिको साझा अभियान रहेको बताए। उनले महोत्सवलाई सफल बनाउन आम नागरिक, उद्योगी, व्यवसायी तथा सम्बन्धित निकायबीच सहकार्य आवश्यक रहेकोमा जोड दिए।
अध्यक्ष खाँणका अनुसार महोत्सवमा शान्ति–सुरक्षालाई उच्च प्राथमिकता दिइनेछ। सुरक्षाको दृष्टिले प्रहरी, सशस्त्र प्रहरी, स्थानीय प्रशासन र निजी सेक्युरिटी कम्पनीसँग समन्वय गरिएको छ। साथै, सिसिटिभी क्यामेरा, ड्रोनमार्फत निगरानी र स्वयम्सेवक परिचालन गर्ने तयारी गरिएको उनले जानकारी दिए।
महोत्सवको आकर्षण र उद्देश्यबारे जानकारी दिंदै सोसाइटीका महासचिव बुद्धिबहादुर रोकाहा क्षेत्री (दिनेश) ले यस वर्षको महोत्सवले कपिलवस्तु जिल्लाको पहिचान, सम्भावना र अवसरलाई राष्ट्रिय तथा अन्तर्राष्ट्रिय स्तरमा चिनाउने बताए। उनका अनुसार, महोत्सवमा —
महासचिव क्षेत्रीले यसपटकको महोत्सवलाई व्यक्तिगत स्वार्थभन्दा बाहिर राखी सबै पक्षको सहकार्यमा भव्य र सफल रूपमा सम्पन्न गर्दै यसलाई राष्ट्रियस्तरको औद्योगिक प्रदर्शनीका रूपमा स्थापित गर्ने लक्ष्य रहेको बताए।
पत्रकार सम्मेलनमा कपिलवस्तु उद्योग वाणिज्य संघका अध्यक्ष गणेश बहादुर क्षेत्री, निवर्तमान अध्यक्ष डोलकराम घिमिरे, पूर्वअध्यक्ष विष्णु प्रसाद न्यौपाने, युवा समाजसेवी शक्तिसिंह ठकुरी, नेपाल पत्रकार महासंघका केन्द्रीय सदस्य विकास बन्जाडे, कपिलवस्तु पत्रकार महासंघका पूर्वअध्यक्ष मनोज पौडेल, किरणमान बज्राचार्यलगायत जिल्लाका पत्रकारहरूको उपस्थितिमा तयारीका विषयमा विस्तृत जानकारी दिइयो।
वेलफेयर सोसाइटीले यसअघि पनि तेस्रो, पाँचौं, सातौं, नवौं र एघारौं संस्करणका कपिलवस्तु महोत्सवहरू सफलतापूर्वक सम्पन्न गरिसकेको छ। ती अनुभवका आधारमा सोसाइटीले अब छैटौं पटक बुद्धरंगशालामै १६औं संस्करणको महोत्सव आयोजना गर्न तयारी तीव्र पारेको हो।
आयोजक संस्थाका अनुसार महोत्सवले स्थानीय उत्पादन, सांस्कृतिक सम्पदा, र पर्यटन सम्भावनालाई देश–विदेशमा चिनाउने, साथै युवा उद्यमशीलता र लगानीका नयाँ अवसर सृजना गर्ने अपेक्षा गरिएको छ .
