लुदस, जीतपुर
कपिलवस्तु
क्रान्तिकारी कम्युनिस्ट पार्टी नेपालले आगामी निर्वाचन बहिष्कार गर्ने निर्णय गरेको छ । पार्टीको जिल्ला संगठन समिति, कपिलवस्तुले जारी गरेको प्रेस वक्तव्यमा वर्तमान संसदीय निर्वाचन व्यवस्था जनताको पक्षमा नरहेको भन्दै निर्वाचन बहिष्कार गर्ने घोषणा गरिएको हो ।
वक्तव्यमा भनिएको छ– २०६२/०६३ को जनआन्दोलनपछि स्थापित संसदीय व्यवस्था विदेशी हस्तक्षेप, दलाल पुँजीवाद र साम्राज्यवादी शक्तिहरूको प्रभावमा परेको आरोप लगाइएको छ। निर्वाचन प्रक्रियामार्फत जनताको वास्तविक समस्या समाधान हुन नसकेको र यसले दलाल तथा नोकरशाही शक्तिलाई मात्र फाइदा पुर्याएको पार्टीको ठहर छ ।
पार्टीले निर्वाचनलाई जनताको चेतनालाई कमजोर बनाउने र क्रान्तिकारी आन्दोलनलाई भड्काउने माध्यमका रूपमा प्रयोग गरिएको आरोप लगाएको छ। साथै, निर्वाचन प्रणालीमार्फत राष्ट्रिय स्वाधीनता, जनताको अधिकार र समाजवादी व्यवस्था स्थापना सम्भव नरहेको दाबी गरिएको छ ।
वक्तव्यमा नेपालमा विगतका निर्वाचनहरूले जनताको जीवनस्तरमा कुनै ठोस परिवर्तन ल्याउन नसकेको उल्लेख गर्दै किसान, मजदुर र श्रमिक वर्ग अझै शोषणमा परिरहेको जनाइएको छ । त्यसैले वैज्ञानिक समाजवादी व्यवस्था स्थापनाका लागि संसदीय निर्वाचन बहिष्कार आवश्यक रहेको पार्टीको निष्कर्ष छ ।
क्रान्तिकारी कम्युनिस्ट पार्टी नेपालले जनतालाई निर्वाचन बहिष्कारमा सहभागी हुन आह्वान गर्दै जनताको वास्तविक मुक्ति र समानता मूलक समाज निर्माणका लागि वैकल्पिक क्रान्तिकारी बाटो अवलम्बन गर्न आग्रह गरेको छ।
क्रान्तिकारी कम्युनिष्ट पार्टीले अहिलेको संसदिय निर्वाचनलाई वहिस्कार गरेर जनताको आन्दोलनलाई स्वाधिन युक्त सरकार निर्माण गर्ने दिशामा अगाडी बढ्नु आजको आवश्यकता रहेको ठहर गरेको छ ।
वक्तव्य पार्टीका तर्फबाट जिल्ला सचिवद्वारा जारी गरिएको हो ।
निर्वाचन वहिस्कारको घोषणा आज एक कार्यक्रमका विच पत्रकार सम्मेलन गरेर गरिएको हो । पत्रकार सम्मेलनमा बोल्दै पुर्व केन्द्रिय सदस्य प्रेम सुवेदीले पत्रकारहरुले राखेका जिग्यासाका विषयमा जवाफ दिन’भएको थियो । कार्यक्रम जिल्ला सचिव हिमलाल वाग्लेको संचालनमा संम्पन्न भएको थियो ।
