कपिलवस्तुको कृष्णनगरबाट प्रहरीले भारतबाट अवैध रूपमा भित्र्याइएका साढे ५ लाख रुपैयाँभन्दा बढी मूल्यका सामग्री बरामद गरेको छ।
शनिबार कृष्णनगरका दुई छुट्टाछुट्टै स्थानबाट सवारी साधनका पार्टपुर्जा र इलेक्ट्रिक सामग्रीहरू बरामद गरिएको हो।
प्रहरीले कृष्णनगर बसपार्क क्षेत्रबाट २ लाख ४० हजार ४२० रुपैयाँ बराबरका सवारी साधनका पार्टपुर्जाहरू बेवारिसे अवस्थामा फेला पारेको थियो।
यस्तै, कृष्णनगरस्थित चेकप्वाइन्टबाट अवैध रूपमा नेपाल भित्र्याउँदै गरेको अवस्थामा ३ लाख १५ हजार रुपैयाँ बराबरका सामग्री बरामद भएको छ।
चेकजाँचका क्रममा इलेक्ट्रिक गाडीको ब्याट्री २ थान र बेडमा प्रयोग हुने पांग्रा २० थान फेला परेको हो। प्रहरीलाई देख्नासाथ सामान ल्याउने तस्कर भने फरार भएको बताइएको छ।
बरामद गरिएका सम्पूर्ण सामग्री आवश्यक कारबाहीका लागि कृष्णनगर भन्सार कार्यालयमा बुझाइएको जिल्ला प्रहरी कार्यालयका प्रहरी नायब उपरीक्षक (डिएसपी) रिपेन्द्रकुमार सिंहले जानकारी दिए।
