नेपाल कम्युनिष्ट पार्टी (एमाले) का नेता तथा मायादेवी गाउँपालिका का पूर्व अध्यक्ष बजरंगी प्रसाद कुर्मीले पार्टीबाट राजीनामा दिएका छन्। उनले सामाजिक सञ्जालमार्फत ‘जेनजी मुभमेन्ट’ लगायत समसामयिक राजनीतिक विषयमा असन्तुष्टि जनाउँदै राजीनामा दिएको जानकारी दिएका हुन्।
कुर्मीले लुम्बिनी दर्पण सँगको कुराकानीमा आफ्नो आगामी राजनीतिक समर्थन स्वतन्त्र युवा सांसद आशिष शर्मा लाई रहने संकेत गरेका छन्। उनले कपिलवस्तु क्षेत्र नम्बर १ मा युवापुस्ताको प्रतिनिधित्व गर्दै आशिष शर्मा जिल्लाकै आशालाग्दो र ऊर्जाशील व्यक्तित्व भएको बताए। “परिवर्तनका लागि अब युवालाई अघि सार्नुपर्छ भन्ने मेरो धारणा हो,” कुर्मीले भनेका छन्।
उनले एक–दुई दिनभित्र पत्रकार सम्मेलन गरी राजीनामा र आफ्नो आगामी राजनीतिक धाराबारे औपचारिक धारणा सार्वजनिक गर्ने तयारी गरेको पनि बताएका छन्।
कपिलवस्तु–१ मा राजनीतिक समीकरण बदलिँदै
कुर्मीको राजीनामासँगै कपिलवस्तु क्षेत्र नम्बर १ मा राजनीतिक समीकरण बदलिने संकेत देखिएको छ। स्थानीय तहमा प्रभाव राख्ने नेताको समर्थनले स्वतन्त्र उम्मेदवारका रूपमा स्थापित आशिष शर्माको पकड अझ बलियो हुने आकलन गरिएको छ।
राजनीतिक विश्लेषकहरूका अनुसार,शर्माको युवामैत्री एजेन्डाले कपिलवस्तु–१ मा नयाँ शक्ति उदाउने सम्भावना बढाएको छ। कुर्मीको निर्णयले एमालेभित्र आन्तरिक छलफल र समीक्षाको आवश्यकता समेत देखाएको छ।
पत्रकार सम्मेलनपछि यस विषयमा थप स्पष्टता आउने अपेक्षा गरिएको छ। कपिलवस्तु–१ मा युवा नेतृत्व र स्वतन्त्र राजनीतिक धारको प्रभाव कति बढ्छ भन्ने विषयले अब स्थानीय राजनीतिक वृत्तमा चासोको केन्द्र बनेको छ।
उनि यस अगाडी जसपा बाट गाउँपालिका अध्यक्षमा निर्वाचित भएका थिए ।
