लुदस,कपिलवस्तु,
कपिलवस्तु जिल्लाको विजय नगर गाउँपालिकामा आज राष्ट्रिय जनमोर्चाको पालिका स्तरीय भेला सम्पन्न भएको छ। राष्ट्रिय जनमोर्चा कपिलवस्तु जिल्ला सचिव केरसिंह अदैको प्रमुख आतिथ्यतामा सम्पन्न भेलाले गोविन्द परियारको संयोजकत्वमा ५१ सदस्यीय पालिका स्तरीय प्रचार–प्रसार समिति गठन गरेको छ।
त्यसैगरी भेलाले त्रिवेणी कुर्मीको संयोजकत्वमा ५ सदस्यीय आर्थिक समिति पनि गठन गरेको छ।
भेलालाई सम्बोधन गर्दै राष्ट्रिय जनमोर्चा जिल्ला सचिव तथा प्रतिनिधिसभा सदस्य उम्मेदवार (क्षेत्र नं. ३) केरसिंह अदैले आगामी फागुन २१ गते हुने निर्वाचनलाई सफल बनाउन गाउँ–गाउँबाट जनतालाई जागरुक बनाउनुपर्नेमा जोड दिनुभयो। उहाँले चुनावका बेला जमिन्दार तथा दलाल प्रवृत्तिले विभिन्न प्रलोभन देखाएर जनतालाई भ्रममा पार्ने प्रयास गर्ने गरेको उल्लेख गर्दै कार्यकर्ताहरू यसप्रति सचेत रहनुपर्ने बताउनुभयो।
भेलामा जातीय समता समाजका केन्द्रीय सदस्य तथा कपिलवस्तु जिल्ला अध्यक्ष रामबहादुर विक, राष्ट्रिय जनमोर्चा जिल्ला सदस्य त्रिवेणी कुर्मी तथा राष्ट्रिय जनमोर्चाका तर्फबाट समानुपातिक उम्मेदवार तारमती पासीले मन्तव्य राख्दै निर्वाचन सफल पार्न सबै कार्यकर्ता सक्रिय रूपमा लाग्नुपर्ने धारणा व्यक्त गर्नुभयो।
भेलाले पालिका भित्र दुई स्थानमा उम्मेदवार परिचय तथा भेटघाट कार्यक्रम सञ्चालन गर्ने र पालिका स्तरीय प्रचार–प्रसार कार्यालय वडा नं. ४ ज्योति नगरमा स्थापना गर्ने निर्णय समेत गरेको छ।
कार्यक्रम गोविन्द परियारको अध्यक्षतामा तथा पप्पु कलवारको सञ्चालनमा सम्पन्न भएको थियो।
