कपिलवस्तु,
संविधान संशोधनको सन्दर्भमा गणतन्त्र र राष्ट्रियताको विषयलाई केन्द्रमा राख्दै राष्ट्रिय जनमोर्चा कपिलवस्तुले आज चार नम्बर जीतपुरमा वृहत अन्तर्क्रिया कार्यक्रम सम्पन्न गरेको छ।
कार्यक्रममा प्रमुख अतिथिका रूपमा उपस्थित राष्ट्रिय जनमोर्चाका केन्द्रीय सल्लाहकार बद्रे आलम ले १५ बुँदे कार्यपत्र प्रस्तुत गर्दै संविधान संशोधनका विषयमा सचेत रहनुपर्ने आवश्यकता औंल्याएका थिए। उनले गणतन्त्र र राष्ट्रियताको रक्षा, संघीयताको खारेजी तथा वर्तमान अवस्थामा राष्ट्रिय एकताको आवश्यकता रहेको विषय कार्यपत्रमा समेटिएको जानकारी दिए।
प्रस्तुत कार्यपत्रमा वर्तमान सरकारको अधिनायकवादी चरित्र र मौलिक अधिकारमाथिको हस्तक्षेपले २०७२ सालको संविधानले प्रदान गरेका अधिकारमाथि कुठाराघात भएको उल्लेख गरिएको थियो। साथै गणतन्त्र, प्रजातन्त्र र संविधान पक्षधर शक्तिहरूबीचको एकताबाट मात्रै संविधान तथा प्राप्त उपलब्धिको रक्षा गर्न सकिने निष्कर्ष प्रस्तुत गरिएको थियो।
कार्यक्रममा कार्यपत्रमाथि धारणा राख्दै नेपाली कांग्रेस का नेता हरी प्रसाद पौडेल, नेपाल कम्युनिष्ट पार्टी (एमाले) जिल्ला सचिवालय सदस्य भेषराज पाण्डे, नेपाल कम्युनिष्ट पार्टी लुम्बिनी प्रदेश सदस्य नारायण भुसाल, नेकपा माओवादी केन्द्र का केन्द्रीय सदस्य संघ प्रसाद थारु, क्रान्तिकारी कम्युनिष्ट पार्टीका जिल्ला इन्चार्ज दीपक पौडेल, नागरिक समाज कपिलवस्तुका अध्यक्ष अर्जुन पोखरेल तथा नेकपा मसाल का जिल्ला प्रवक्ता माधव भाट क्षेत्री ले आ–आफ्नो धारणा राखेका थिए।
वक्ताहरूले गणतन्त्र र राष्ट्रियताको रक्षा तथा सरकारका अधिनायकवादी कदमविरुद्ध साझा धारणा निर्माण गर्न आवश्यक रहेको बताएका थिए। साथै विभिन्न राजनीतिक शक्तिलाई एक ठाउँमा ल्याउने प्रयास गरेको भन्दै राष्ट्रिय जनमोर्चालाई धन्यवाद दिएका थिए। यद्यपि संघीयता खारेज गर्ने विषयमा भने सहभागीहरूबीच फरक–फरक धारणा रहेको थियो।
रामप्रसाद बेल्बासे को अध्यक्षतामा सम्पन्न कार्यक्रममा अखिल नेपाल किसान सङ्घका केन्द्रीय उपाध्यक्ष शिव पौडेल को आतिथ्यता रहेको थियो। कार्यक्रम सञ्चालन शशी सापकोटाले गरेका थिए भने स्वागत मन्तव्य राजमो जिल्ला सचिव केर सिंह अदैले राखेका थिए।
