दाङ । नेकपा एमालेका महासचिव शंकर पोखरेलले जसले परिवर्तन रोजे उनिहरु नै अहिले सबैभन्दा ज्यादा असुरक्षित हुने अवस्था आएको बताए । प्रेस चौतारी दाङ शाखाको आयोजनामा भएको पत्रकार भेटघाट कार्यक्रममा यस्तो बताएका हुन् ।
‘चुनावका समयमा एउटा नारा लगाइयो चुपचाप घन्टीमा छाप । अर्को अर्थमा भन्ने हो भने दल नबदल्ने मत बदल्ने । यसपटक त नयाँलाई रोज्ने जुन प्रकारको मान्यता अघि सारियो । जसका कारण सबैभन्दा धेरै गरिबी र अभावमा बाँचेकाहरुले नै नयाँ आए चमत्कारै हुन्छ भन्ने प्रकारको मान्यता राखे । राजनीतिक दलहरुसँग सम्बन्ध पनि नबिगार्ने र भोट पनि नदिने जुन नीति अख्तीयार गरे । आज त्यसैको परिणाम जनताले भोगिरहेका छन् ।’-महासचिव पोखरेलले भने । भदौ २३ र २४ को परिवर्तन मूलुकलाई अघि बढाउनका लागि गरिएको नभई देशलाई पछाडि पार्न र भूराजनीतिक द्वन्दलाई सहयोग पुर्याउनका लागि गरिएको षडयन्त्र भएको बताए ।
आज एमाले कम्जोर हुँदा गरिब तथा विपन्न वर्गले दुःख पाएको बताउँदै पोखरेलले त्यसका विरुद्ध प्रतिवाद गर्ने बताए । ५ वर्षसम्म उनिहरुको हातमा सत्ता गएपनि राष्ट्र, राष्ट्रियता र देशको स्वाधिनताका लागि सडकबाट खबरदारी गनुपर्ने बताए । अव नेतामुखी राजनीति भन्दा पनि जनतामुखी राजनीतिलाई केन्द्रित गर्नुपर्ने भन्दै महासचिव पोखरेलले हरेक नेता तथा कार्यकर्तालाई जनताको घरदैलेमा पुगेर उनिहरुका मुद्दालाई उठाउन आग्रह गरे ।
