लुदस, जीतपुर
कपिलवस्तु नगरपालिका–९ जग्दिशपुर क्षेत्रमा सामुदायिक विद्युत वितरण संस्थाको लापरबाहीका कारण किसानहरू चरम सास्तीमा परेका गुनासो छन् । अत्याधिक गर्मीका बेला सिंचाइ, दुग्ध चिस्यान र दैनिक उपभोगका उपकरण नै सञ्चालन हुन नसक्ने गरी लो–भोल्टेज समस्या बढेपछि स्थानीय आक्रोशित बनेका छन् ।
सामान्यतया २२० भोल्ट आवश्यक पर्ने स्थानमा अहिले १२० देखि १४० भोल्ट मात्र विद्युत आपूर्ति भइरहेको स्थानीयको गुनासो छ । कमजोर भोल्टेजका कारण मोटर नचल्ने, पानी तान्न नसक्ने, फ्रिज तथा चिस्यान केन्द्र बन्द हुने अवस्था सिर्जना भएको छ । यसको प्रत्यक्ष असर किसानको उत्पादन र आम्दानीमा परेको छ ।
साना किसान कृषि सहकारी संस्था जग्दिशपुरका व्यवस्थापक बसन्त मुराउका अनुसार लो–भोल्टेजका कारण दूध तथा दुग्धजन्य पदार्थ पटक–पटक बिग्रिने गरेको छ । “किसानले उत्पादन गरेको दूध जोगाउनै कठिन भएको छ, उपकरण नै चल्दैनन्,” उनले भने ।
स्थानीयले पटक–पटक सामुदायिक विद्युत वितरण संस्थामा समस्या समाधानको माग गरे पनि कुनै सुनुवाइ नभएको आरोप लगाएका छन् । बाध्य भएर उनीहरूले जिल्ला प्रशासन कार्यालय र नेपाल विद्युत प्राधिकरणलाई समेत बोधार्थसहित ध्यानाकर्षण गराएका छन् ।
यता संस्थाका अध्यक्ष अब्दुल रसिद खाँले भने दुई वर्षअघि नै भोल्टेज सुधारका लागि साझेदारी कार्यक्रमअन्तर्गत ४ लाख रुपैयाँ जम्मा गरिएको दाबी गरेका छन् । तर सरकारी ढिलासुस्तीका कारण हालै मात्र ठेक्का प्रक्रिया अघि बढेको उनको भनाइ छ ।
ठेक्का पाएको अनु विकल्प कन्ट्रक्सन एण्ड सप्लायर्सका सञ्चालक नारायण लम्सालले चैत्र महिनामै सम्झौता भए पनि तार अभावका कारण काम सुरु गर्न नसकिएको लुम्बिनी दर्पणलाई बताए । उनले असोजसम्म म्याद रहे पनि असार मसान्तभित्र काम सक्ने लक्ष्य रहेको दाबी गरे ।
तर स्थानीयवासी भने संस्थाले सेवा सुधारभन्दा जग्गा खरिदमा बढी ध्यान दिएको आरोप लगाउँछन् ।वर्षौदेखि किसानको समस्या जस्ताको तस्तै छ,” एक स्थानीयले गुनासो गरे ।
चर्को गर्मीमा विद्युतको गुणस्तर खस्किँदा किसानको खेती, पशुपालन र दैनिक जीवन नै प्रभावित बनेको छ । सम्बन्धित निकायले तत्काल प्रभावकारी कदम नचाले समस्या थप गम्भीर बन्ने स्थानीयको चेतावनी छ ।
