लुदस, जीतपुर
बाणगङ्गा नगरपालिकाले आर्थिक वर्ष २०८३/०८४ को नीति तथा कार्यक्रम मार्फत “ब्राण्ड बाणगङ्गा, बिलिभ बाणगङ्गा” अभियानलाई थप प्रभावकारी रूपमा अगाडि बढाउने घोषणा गरेको छ ।
अभियानको मुख्य उद्देश्य नगरपालिकाका प्रशासनिक, विकासात्मक तथा अन्तरनिकाय समन्वयात्मक गतिविधिलाई नीति, विधि र प्रविधिमैत्री बनाउँदै नागरिकको खुसियाली अभिवृद्धि गर्नु रहेको जनाइएको छ ।
नगरपालिकाले समावेशी, समानुपातिक तथा सहभागितामूलक विकासलाई प्राथमिकता दिँदै सूचना प्रविधिमा आधारित सेवा प्रवाह सुनिश्चित गर्ने लक्ष्य लिएको छ । यस अभियानअन्तर्गत सेवा प्रवाहलाई छिटो, पारदर्शी र उत्तरदायी बनाउन डिजिटल प्रणालीको अधिकतम प्रयोग गरिने तथा नागरिकमा डिजिटल साक्षरता अभिवृद्धिमा विशेष जोड दिइनेछ ।
नीति तथा कार्यक्रममा आर्थिक वर्ष २०८१/०८२ मा स्वीकृत “ब्राण्ड बाणगङ्गा, बिलिभ बाणगङ्गा” कार्यात्मक रणनीतिलाई निरन्तरता दिँदै नगरपालिकालाई विशिष्ट पहिचानयुक्त ब्राण्डका रूपमा स्थापित गर्ने प्रतिबद्धता व्यक्त गरिएको छ। साथै नगरपालिकाका गौरवका आयोजनाहरू क्रमशः सम्पन्न गर्दै बाणगङ्गाको पहिचान र विकासलाई थप सुदृढ बनाइने उल्लेख गरिएको छ।
विकास प्रक्रियामा नागरिकको अपनत्व बढाउन लागत सहभागिता, जनसहभागिता तथा सार्वजनिक–निजी साझेदारी मोडललाई प्राथमिकतामा राखिएको छ । यसका साथै पारदर्शिता, मितव्ययिता र प्रभावकारितामा आधारित परिणाममुखी कार्यशैली अवलम्बन गरी जनजीवनमा प्रत्यक्ष सकारात्मक परिवर्तन ल्याउने लक्ष्य राखिएको नगरपालिकाले जनाएको छ।
नगर प्रमुख चक्र अर्यालले सुशासन, पारदर्शिता र जवाफदेहितालाई संस्थागत गर्दै समृद्ध, आत्मनिर्भर र आधुनिक बाणगङ्गा निर्माणका लागि अभियानलाई साझा सङ्कल्पका रूपमा अघि बढाइने बताएका छन् । “ब्राण्ड बाणगङ्गा, बिलिभ बाणगङ्गा” अभियानले विकास, प्रविधि, सुशासन र जनसहभागितालाई एकीकृत गर्दै नगरको दीर्घकालीन समृद्धिको आधार तयार गर्ने अपेक्षा गरिएको छ ।
