मोहन बेल्वासे/जीतपुर
कपिलवस्तुको बाणगंगा नगर क्षेत्रमा पछिल्लो समय चोरीका घटनामा उल्लेख्य वृद्धि भएपछि स्थानीयवासी त्रसित बनेका छन्। मन्दिरका दानपेटिका, घण्टी, धार्मिक सामग्रीदेखि मोटरसाइकल र सुनका गरगहनासम्म चोरी हुन थालेपछि सुरक्षाको विषयमा गम्भीर चिन्ता बढेको छ। तर लगातार चोरीका घटना भइरहँदा पनि प्रहरीले प्रभावकारी विशेष अभियान सञ्चालन नगरेको भन्दै स्थानीयले असन्तुष्टि व्यक्त गरेका छन्।
गएराति मात्रै बाणगंगा–स्थित धनेशपुरको दुर्गा मन्दिरबाट दानपेटिका, करिब १८ किलो तौलको घण्टी तथा तरबार चोरी भएको स्थानीयवासीले बताएका छन्। धार्मिक आस्थाको केन्द्रमै चोरी भएपछि स्थानीय आक्रोशित बनेका छन्।
उही राति बाणगंगा नगरपालिका–११, ओदारीमा निर्माण खनालको घरमा पार्किङ गरिएको लु ०१–००५ प ५०४१ नम्बरको मोटरसाइकल समेत चोरी भएको छ। घरमै सुरक्षित राखिएको मोटरसाइकल रातारात हराएपछि स्थानीयवासीमा थप त्रास फैलिएको छ।
यसअघि पनि असार १९ गते राति बाणगंगा–६, सुठौलीबाट एउटा पल्सर मोटरसाइकल चोरी भएको थियो। त्यसैगरी असारको पहिलो सातामै पिपराबाट अर्को डिस्कभर मोटरसाइकल चोरी भएको घटना सार्वजनिक भएको थियो। यसरी असार महिनामै तीनवटा मोटरसाइकल चोरी भएका घटनाले सुरक्षा व्यवस्थामाथि प्रश्न उठाएको छ।
यद्यपि इलाका प्रहरी कार्यालय पिपराले भने जेठ महिनामा तीन र असारमा एक गरी चारवटा मोटरसाइकल चोरी भएको अभिलेख रहेको जनाएको छ। प्रहरीका अनुसार जेठमा चोरी भएको एउटा र असारमा चोरी भएको एउटा मोटरसाइकल फेला परिसकेको छ। तर स्थानीयले असार महिनामा चोरी भएका तीनवटै मोटरसाइकल अझैसम्म बरामद नभएको बताएका छन्।
स्थानीयवासीका अनुसार पछिल्ला केही सातायता विभिन्न स्थानमा सुनका गरगहना चोरी, मन्दिरका दानपेटिका फोड्ने तथा धार्मिक सामग्री चोरी गर्ने घटना समेत बढिरहेका छन्। यस्ता घटनाले सर्वसाधारणमा असुरक्षाको भावना बढाएको छ।
लगातार श्रृंखलाबद्ध चोरी भइरहे पनि प्रहरीले विशेष अपरेशन सञ्चालन नगरेको, रातिको गस्ती प्रभावकारी नभएको तथा चोरी नियन्त्रणका लागि ठोस रणनीति नदेखिएको भन्दै स्थानीयले आलोचना गरेका छन्। चोरीका घटनामा संलग्न समूहको खोजी गरी तत्काल नियन्त्रणमा लिन, रात्री गस्ती बढाउन तथा संवेदनशील क्षेत्रमा निगरानी सुदृढ बनाउनुपर्ने देखिन्छ ।
