तौलिहवा । कपिलवस्तु नगरपालिकाका पूर्वमेयर किरण सिंह तिलौराकोट साझेदारी वन क्षेत्रमा मृत अवस्थामा फेला परेका छन्। शुक्रबार दिउँसोदेखि बेपत्ता रहेका सिंहको शव आइतबार बिहान जंगलको दक्षिणी क्षेत्रमा फेला परेको जिल्ला प्रहरी कार्यालय कपिलवस्तुले जनाएको छ।
सिंह शुक्रबार दिउँसो करिब ३ बजेदेखि सम्पर्कविहीन भएका थिए। बेपत्ता हुनुअघि उनले आफू जंगलमा हराएको र आफ्नो ज्यान खतरामा रहेको भन्दै मोबाइलमार्फत केही व्यक्ति तथा गोरुसिंगे प्रहरीलाई जानकारी गराएका थिए।
उनको खोजीका क्रममा तौलिहवा–गोरुसिंगे सडकदेखि करिब दुई किलोमिटर पूर्व जंगलभित्र मोटरसाइकल फेला परेको थियो। त्यसपछि नेपाल प्रहरी, सशस्त्र प्रहरी, ड्रोन, तालिमप्राप्त कुकुरसहित स्थानीय युवाहरूको ठूलो टोलीले व्यापक खोजी अभियान सञ्चालन गरेको थियो।
आइतबार बिहान पुनः खोजीलाई तीव्र पार्ने क्रममा मोटरसाइकल फेला परेको स्थानबाट करिब एक किलोमिटर टाढा सिंहको शव फेला परेको प्रहरीले जनाएको छ।
प्रहरीका अनुसार घटनाको प्रकृति शंकास्पद देखिएको छ। घटनाबारे थप अनुसन्धान सुरु गरिएको र अनुसन्धानपछि मात्र विस्तृत विवरण सार्वजनिक गरिने प्रहरीले जनाएको छ।
सिंहको शव फेला परेसँगै घटनाले कपिलवस्तुमा थप चासो र चिन्ता उत्पन्न गरेको छ। प्रहरीले घटनाको वास्तविक कारण पत्ता लगाउन अनुसन्धान अघि बढाएको छ।