मनाङमा मस्र्याङ्दी नदी थुनिएर बनेको ताल अहिले खोलिएको प्रमुख जिल्ला अधिकारी विष्णु लामिछानेले जानकारी दिनुभयो । नेस्याङ गाउँपालिका–४ हुम्डेमा नदी वरिपरिबाट गएको पहिरोले केहीबेर नदी थुनिएको थियो । नदी अहिले बगिरहेको र अहिले पानीको सतह बढेको उहाँको भनाइ छ । विगत एक सातायता अत्यधिक वर्षाका कारण मस्याङ्दी नदीमा उर्लिएको बाढी आज झनै बढेको छ । तल्लो तटीय क्षेत्रमा जोखिम बढ्ने भन्दै सबैतिर सूचना दिइएको पनि उहाँले बताउनुभयो । नदीमा उर्लिएको बाढीका कारण चामेबाट हुम्डे जाने ट्रसको पुल नाघेर पानी बगिरहेको छ । नदीमा डुङ्गा, बालुवा, माटो लगायत मिसिएर लेदो बगेको छ भने नदीले बगाएर ल्याएको रुख लगायत पुलमा अड्किएको प्रमुख जिल्ला अधिकारी लामिछानेले जानकारी दिनुभयो । बाढीले पुल भत्काउन सक्ने अवस्था समेत रहेको छ । सदरमुकाम चामेमा केही दिनअघि नै थुनिएको मस्र्याङ्दी अहिलेसम्म पनि पूर्ण रुपमा खुल्न नसकेको प्रमुख जिल्ला अधिकारी लामिछानेले बताउनुभयो । चामेमा च्याट्टेखोला र घट्टेखोलामा आएको बाढीले यसअघि नै १० घर भत्काइसकेको छ भने झण्डै तीन सय जना विस्थापित भएका छन्।