असार २७

जंगलबाट बस्तीमा छिरेको चितुवाको आक्रमणबाट नवलपरासी (बर्दघाट–सुस्तापूर्व) को मध्यविन्दुका एक जना किसानको भेडागोठ नै रित्तिएको छ । मध्यविन्दु–१,का कृषक मनकुमारी महतोले गोठभित्र थुनेका १५ भेडामध्ये ११ वटा भेडा चितुवाको आक्रमणबाट मरेको जिल्ला प्रहरी कार्यालय नवलपरासी (बर्दघाट–सुस्तापूर्व) का प्रवक्ता प्रहरी नायब उपरीक्षक दिलीपकुमार गिरीले जनाकारी दिनुभयो । चितुवाको आक्रमणबाट गोठमा रहेका अन्य चार वटा भेडा घाइते छन् । स्थानीय गणेश महतोले चितुवाको आक्रमणबाट दुई लाख रुपैयाँभन्दा बढीको क्षति भएको बताउनुभयो । कच्ची गोठ भएकाले सजिलैसँग चितुवा गोठभित्र छिरेर भेडालाई आक्रमण गरेको हुन सक्ने प्रहरीले जनाएको छ ।