चर्चित कथावाचिका देवी प्रतिभा ,प्रतिभा पराजुल फेरी नेपाल आउने भएकी छिन् । ‘प्यार से बोलो ना’ थेगोले चर्चा कमाएकी देवी प्रतिभा मकर स्नान माघ महामहोत्सवका अवसरमा १ महिनासम्म चल्ने महायज्ञमा कथावाचन गर्नका लागि चितवनको देवघाटमा आउन लागेको आयोजकले जनाएको छ । यसअघि पशुपतिनाथ मन्दिरमा करिब १५ दिन कथा वाचन गरेर धेरैको मन जितेकी २३ वर्षीय प्रतिभा पराजुली, अर्थात् ‘देवी प्रतिभा’ ले यस पटक १० दिनका लागि देवघाटमा कथा वाचन गर्नका लागि आउन लागेकी हुन् ।
मातापिता सेवा आश्रम र देवघाट दिव्य धामको निर्माण सहयोगार्थ लगाइने ‘देवघाट महा महोत्सव’मा देवी प्रतिभाका अलावा पूज्य ईश्व्रकृष्ण महाराजजी, पूज्य ओम प्रकाश गुरु, पूज्य यशोदा कौडिन्य र पूज्य अनुराधा पाण्डेयले पनि कथावाचन गर्ने कार्यक्रम रहेको आयोजकले जनाएको छ । मकर स्नान माघ महामहोत्सवका अवसरमा आश्रम र दिव्य धामको निर्माण सहयोगार्थ लगाइने देवघाट महामहोत्सवबाट उठेको सहयोग रकम निर्माणाधीन मातापिता सेवा आश्रमका लागि खर्च गरिनेछ ।
माघ महिनाभर चल्ने महोत्सवका अवसरमा ३३ कोटी देवताको नाममा ३३ करोड दीप प्रज्वलन गर्ने कार्यक्रम पनि रहेको छ । त्यस्तै विश्वकै नमुना मन्दिर देवघाट दिव्य धाम मन्दिरको पनि शिलान्यास गरिने आयोजक कमिटीले जनाएको छ । निर्माणाधीन आश्रममा यो समाचार तयार पार्दासम्म ५ तले ६ वटा भवनका १४१ कोठा करिब निर्माणको अन्तिम चरणमा रहेका छन् भने अन्य कोठाहरू निर्माणको तयारीमा छन् ।,
६ वटा भवनमा गरेर कुल ३६५ कोठा बनाउने योजना मातापिता सेवा आश्रमको रहेको छ । जहाँ देश विदेशबाट साधु सन्त तथा भक्तजनहरूको ठुलो संख्यामा उपस्थिती रहने आयोजकले जनाएको छ । माघ महिनाभर चल्ने यस दिव्य धाम शिलान्यास, ऐतिहासिक मकर स्नान माघे मेलालाई सफल पार्न आयोजकले सम्पूर्ण देशवासीहरूमा अपिल गरेको छ ।
सडकमा अलपत्र परेका बाबु आमालाई सहारा दिँदै आएको मातापिता सेवा आश्रम देशकै ठुलो आश्रमका रूपमा निर्माण हुन लागेको हो । उक्त महामहोत्सवमा आचार्य बालकृष्णजी महाराजको पनि उपस्थिति रहने बताइएको छ । कार्यक्रमको व्यवस्थापक भने आचार्य श्रीधर बस्याल रहेका छन् । परिवारविहीन हुँदै सडकमा अलपत्र पर्ने तथा अविभिावक विहीनहरुको घाउमा मलहम लगाउने उद्देश्यले महामहोत्सवको परिकल्पना गरिएको हो ।
ठुलो क्षेत्रफलमा फैलिएको उक्त आश्रमको निर्माणको काम आर्थिक अभावले अलपत्र पर्ने डर रहेकाले सङ्कल्पकर्ता ईश्वरकृष्ण महाराजजीले हिम्मत गरेर माघ महिनाभरि नै कथा वचानदेखि विविध सांस्कृतिक कार्यक्रम गर्ने तयारी गरेको आयोजकले जनाएको छ ।