नेत्र पाण्डे
कृषकको ५०% लगानी, तानसेन नगरपालिका र हेफर नेपालको ५०% साझेदारी सहयोग । वडा अध्यक्षले बाँदर आतङ्कप्रति चिन्ता व्यक्त गर्दै समाधानको प्रतिबद्धता जनाए
पाल्पा जिल्ला अन्तर्गत तानसेन नगरपालिका–१४, अर्गलीमा कृषकहरूलाई यान्त्रिक कृषि औजार वितरण कार्यक्रम भव्य रूपमा सम्पन्न भएको छ। आधुनिक कृषि प्रणालीलाई प्रवर्द्धन गर्ने उद्देश्यसहित आयोजित कार्यक्रममा कृषकहरूको ५० प्रतिशत लगानी र तानसेन नगरपालिका ७०% तथा हेफर नेपाल ३०% को अनुदान सहयोगमा उपकरणहरू वितरण गरिएको हो। कार्यक्रम रेडा पाल्पाको सहजीकरणमा सम्पन्न गरिएको हो।
कार्यक्रममार्फत ४८ थान मिनि टिलर, २९ थान कम्बाइन मिल र १२ थान कन्सेलर स्थानीय कृषकहरूलाई वितरण गरियो।
अध्यक्ष भट्टराई; बाँदर आतङ्क अर्गलीको सबभन्दा ठूलो चुनौती
कार्यक्रमका प्रमुख अध्यक्ष तथा वडा नं १४ का अध्यक्ष श्री शोभाकर भट्टराईले उपकरण वितरण कृषि आत्मनिर्भरतातर्फको ठूलो पाइलाका रूपमा चित्रण गर्दै बाँदर आतङ्कले कृषकहरूको श्रम र सपना तहसनहस पारेको उल्लेख गर्नुभयो। उहाँले बाँदर नियन्त्रणका लागि नगरस्तरीय मात्र नभई, प्रदेश र संघ सरकारसँग पनि पहल गरिने प्रतिबद्धता व्यक्त गर्नुभयो।
“कसैलाई छोडिएको छैन, केही प्राविधिक कारणले वितरणमा छुटेकालाई अर्को चरणमा समेटिनेछ,” उहाँको भनाइ थियो।
मेयर श्रेष्ठ ; कृषिमा आत्मनिर्भरता नै विकासको मेरुदण्ड
कार्यक्रमका प्रमुख अतिथि तथा तानसेन नगरपालिकाका मेयर श्री सन्तोष लाल श्रेष्ठले कृषिमा प्रविधिको प्रयोगबाट उत्पादन, आम्दानी र जीवनशैलीमा गुणात्मक परिवर्तन सम्भव हुने उल्लेख गर्नुभयो। उहाँले नगरपालिकाले कृषकहरूलाई सहयोग गर्न सधैं तत्पर रहेको भन्दै भविष्यमा यस्ता कार्यक्रम अन्य वडामा पनि विस्तार गरिने जानकारी दिनुभयो।
“अबको पाल्पा खेतीपातीमा आत्मनिर्भर, प्रविधिमा सक्षम र कृषकमैत्री बन्नेछ,” उहाँले जोड दिनुभयो।
प्रवक्ता कार्की ; किसान आत्मविश्वासी बन्न थालेका छन्
विशेष अतिथि तथा तानसेन नगरपालिकाका प्रवक्ता श्री यादव सिंह कार्कीले किसानलाई केवल उपकरण मात्र होइन, आत्मविश्वास पनि प्रदान गरिएको उल्लेख गर्नुभयो। उहाँले नगरपालिकाको योजनाले कृषिमा युवा सहभागिता, प्रविधिको विस्तार र बजार पहुँचलाई मुख्य प्राथमिकतामा राखेको स्पष्ट पार्नुभयो।
कृषकको सशक्त सहभागिता
उपकरण वितरण कार्यक्रममा कृषकहरूले ५० प्रतिशत लागत स्वयंकै बेहोरेका छन्। बाँकी ५० प्रतिशत लागत नगरपालिका र हेफर नेपालको साझेदारीमा व्यहोरिएको हो।
कार्यक्रममा स्थानीय राजनीतिक दलका प्रमुख, बुद्धिजीवी, किसान, वर्तमान तथा पूर्व जनप्रतिनिधिहरूको सक्रिय सहभागिता रहेको थियो।
कृषकहरूले वितरण गरिएका औजारहरूले खेती गर्न सजिलो हुने, समय र श्रम बचत हुने, तथा उत्पादन वृद्धि भई आम्दानी बढ्ने विश्वास व्यक्त गरेका छन्।
कार्यक्रमले पाल्पाको तानसेन–१४, अर्गलीलाई कृषि प्रविधिको नमुना वडातर्फ डो¥याउने संकेत दिएको सहभागीहरूको भनाइ छ।
