सर्लाही जिल्लाको लालबन्दी नगरपालिकामा टिपरको ठक्करबाट एक युवकको ज्यान गएको छ। दुर्घटनापछि आक्रोशित स्थानीयवासीले संलग्न टिपरमा आगजनी गरेका छन्।
मृतक २० वर्षीय सचिन साह (गुप्ता) सर्लाहीको कबिलासी नगरपालिका–८ अगर्वा निवासी हुन्। उनले साइकल चढिरहेका बेला ना२क ५०१ नम्बरको टिपरले ठक्कर दिएको हो। टिपर जब्दीबाट लालबन्दीतर्फ जाँदै गर्दा लालबन्दी–५ मेजरगञ्जस्थित भित्री सडकमा बुधवार राति करिब ८ बजे दुर्घटना भएको थियो।
घाइते अवस्थामै उनलाई प्रादेशिक अस्पताल मलंगवा पुर्याइएको थियो, तर चिकित्सकले उनलाई मृत घोषणा गरे। घटना पश्चात् टिपर चालक फरार छन्।
दुर्घटनापछि आक्रोशित स्थानीय बासिन्दाले उक्त टिपरमा आगो लगाइदिएका थिए। जिल्ला प्रहरी कार्यालय सर्लाहीका अनुसार घटनाको थप अनुसन्धान भइरहेको छ।
प्रकाशित : २०८२ असार १२, बिहीबार ११:१७
