अमेरिकी ट्रम्प प्रशासनले संयुक्त राज्य अमेरिकामा शरणको माग गर्दै बसेका लाखौं आप्रवासीहरूलाई देशनिकाला गर्ने तयारी तीव्र पारेको छ। शरणार्थीको दाबी अस्वीकृत गर्दै उनीहरूलाई निष्कासन गर्ने योजनामा प्रशासनले आन्तरिक रूपमा चुपचाप प्रक्रिया अगाडि बढाइरहेको अमेरिकी सञ्चार संस्था सीएनएनले जनाएको छ।
यो कदम राष्ट्रपति डोनाल्ड ट्रम्प नेतृत्वको प्रशासनद्वारा आप्रवासन नियन्त्रण गर्न गरिएको अभियानको पछिल्लो रणनीति हो। संघीय अधिकारीहरूमा व्यापक पक्राउको दबाब भइरहँदा, धेरै शरणार्थी आवेदकहरूलाई देश निकाला गर्न योग्य बनाउने कार्य भइरहेको स्रोतहरूले उल्लेख गरेका छन्।
सीएनएनका अनुसार निशानामा परेका धेरै व्यक्तिहरू गैरकानुनी रूपमा अमेरिका प्रवेश गरी पछि शरणका लागि आवेदन दिएका हुन्। ती व्यक्तिहरूको मुद्दा खारेज भएसँगै उनीहरूलाई देशनिकालाको उच्च जोखिम हुने देखिएको छ।
संघीय प्रतिवेदनअनुसार सन् २०२३ मा शरणको लागि आवेदन दिने आवेदकहरूमध्ये झन्डै २५ प्रतिशतले अवैध रूपमा अमेरिका प्रवेश गरेको बताएका थिए, जसको संख्या करिब २ लाख ५० हजार पुगेको बताइएको छ। बाँकीले भने वैध भिसा मार्फत प्रवेश गरेका थिए।
यो निर्णय लागू भएमा अमेरिका बसोबास गरिरहेका लाखौं शरणार्थी आवेदकहरू प्रभावित हुने अनुमान गरिएको छ।
