कृषि तथा पशुपन्छी विकास मन्त्री रामनाथ अधिकारीले नेपालमा रासायनिक मलको अभाव स्थायी समस्या जस्तै भएको बताएका छन्। नेपाल डेरी एसोसिएसनद्वारा आयोजित कार्यक्रममा बोल्दै उनले किसानको मागअनुसार पर्याप्त मल उपलब्ध गराउन सम्भव नभएको स्पष्ट पारे।
“मल अभाव त हुन्छ नै,” मन्त्री अधिकारीले भने, “जो मन्त्री भए पनि हुन्छ। मल अभावको कुरा हरेक वर्ष उठ्छ। तर जब जिम्मेवारीमा बसिन्छ, तब ‘चिन्ता नगर्नुस्, मल आउँछ’ भन्नैपर्छ।”
उनका अनुसार, गत वर्ष कृषि मन्त्रालयको बजेट २७ अर्ब ९५ करोड रुपैयाँ थियो, तर त्यसबाट जम्मा साढे ४ लाख टन मल मात्र ल्याउन सकिन्छ। जबकि बजारमा माग ११ देखि १३ लाख टनको छ।
“हामीसँग चौथाइ मात्र आपूर्ति गर्न सक्ने सामर्थ्य छ,” उनले भने, “त्यसैले समयमै सबै किसानलाई मल पुर्याउने कुरा व्यवहारिक छैन।”
मन्त्री अधिकारीले मन्त्री बनेपछि आफूले धेरै परिवर्तन गर्ने अपेक्षा राखे पनि देशको आर्थिक सीमितताले काम गर्न कठिन भएको स्वीकार गरे।
