इसराइलसँगको एक साताको तनावपछिको युद्धविरामले इरानी जनतालाई केही राहत मिलेको छ, तर देशभरि नयाँ चिन्ता गहिरिँदो छ— सर्वोच्च नेता आयोतुल्लाह अली खामेनी कहाँ छन्?

युद्धविराम घोषणा भएको दुई दिन भइसक्दा पनि खामेनी सार्वजनिक रूपमा देखिएका छैनन्, न त कुनै वक्तव्य, अडियो वा भिडिओ सन्देश सार्वजनिक गरिएको छ। अमेरिकी सञ्चारमाध्यम न्युयोर्क टाइम्स का अनुसार, इरानी जनमानसमा उनीको स्वास्थ्य, अवस्था, र अस्तित्वबारे गम्भीर आशंका फैलिएको छ।

सुरक्षाका कारण बंकरमा खामेनी?
इजरायली आक्रमणपछि खामेनीलाई सुरक्षाका कारण बंकरमा सारिएको र उनी सीमित सम्पर्कमा मात्र रहेको बताइएको छ। इस्लामिक रिभोलुसनरी गार्ड कोर (IRGC) का कमाण्डर तथा खामेनीका सुरक्षा सल्लाहकार हाम्जेह सफावीका अनुसार, उनीमाथि अझै पनि हत्या प्रयासको खतरा कायम रहेको हुँदा उच्च सुरक्षा घेरामा राखिएको हो।

सरकारी मौनता र अस्पष्टता
इरानको सरकारी टेलिभिजनमा खामेनीको कार्यालयका अभिलेख विभाग प्रमुख मेहदी फजाइलीसँग गरिएको अन्तर्वार्तामा पनि स्पष्ट जानकारी दिइएन। ‘उहाँ सुरक्षित हुनुहुन्छ, तर थप जानकारी दिन मिल्दैन,’ फजाइलीले भनेका थिए।

अज्ञात अवस्थाले सत्ता गुटबन्दीमा
खामेनीको अनुपस्थितिमा सत्ता सन्तुलनमा गम्भीर हलचल देखिएको टाइम्स ले जनाएको छ। शक्तिशाली सैन्य, न्यायिक र राजनीतिक नेतृत्वबीच आन्तरिक प्रतिस्पर्धा सुरु भइसकेको छ। राष्ट्रपति मसुद पेजेस्कियन, न्यायालय प्रमुख मोहसेनी-एजेइ, र सेनाका प्रमुख अब्दुलरहीम मुसावी मिलेर संयमताका पक्षमा निर्णय गर्दै गएको देखिएको छ।

खामेनीको उत्तराधिकारी चयन प्रक्रियामा तीव्रता
न्यूयोर्क टाइम्सका अनुसार, खामेनीले आफ्नो उत्तराधिकारी छान्न ‘एसेम्ब्ली अफ एक्सपर्ट्स’ लाई विशेष प्रक्रिया सुरु गर्न निर्देशन दिएका छन्। युद्धको सुरुवातमा खामेनीले टाढैबाट निर्णय गरिरहेका भए पनि उनी प्रत्यक्ष रूपमा निर्णय प्रक्रियाबाट अदृश्य छन्।

ट्रम्पको भनाइले थप गर्यो रहस्य गहिरो
पूर्व अमेरिकी राष्ट्रपति डोनाल्ड ट्रम्पले सामाजिक सञ्जाल ‘ट्रुथ सोसल’ मा खामेनीको बंकरको स्थान आफूलाई थाहा रहेको तर हाललाई हत्या नगर्ने निर्णय भएको बताएका छन्। ‘उनी लुकेको स्थान थाहा छ, तर अहिले मार्दैनौं,’ ट्रम्पले लेखेका थिए।