अन्तर्राष्ट्रिय युवा दिवसको अवसरमा तिलोतमा नगरपालिका वडा नम्बर(९ ले वडाभित्र रहेका युवा व्यवसायीहरुलाई सम्मान गरेको छ।वडा अध्यक्ष ध्रुव न्यौपानेको अध्यक्षता तथा तिलोतमान नगरपालिका प्रमुख रामकृष्ण खाणको प्रमुख अतिथ्यतामा गरिएको उक्त सम्मान कार्यक्रममा ५६ जना युवा व्यवसायीहरु तथा वडाभित्र रहेका चारजना पत्रकारहरू गरी ६० जनालाई युवाहरूलाई सम्मान गरिएको हो।
सम्मान कार्यक्रममा बोल्दै तिलोतमा नगरप्रमुख रामकृष्ण खाणले वडाभित्र रहेका युवा व्यवसायीहरू जसमध्ये अझै धेरै महिला व्यवसायीहरुको उपस्थिति देखेर आफूलाई निकै खुसी लागेको बताउनुभयो। युवाको काँधमा घरपरिवार मात्र नभई समाज र देशै परिवर्तन गर्ने जिम्मेवारी पनि रहेको हुन्छ। राजनीतिक, स्वास्थ्य, शिक्षा हरेक क्षेत्रमा युवाहरू अबल बन्नुपर्ने उहाँले बताउनुभयो। युवाहरू मुलुकमा समृद्धि, विकास र उत्पादनका लागि अगाडि बढनुपर्ने उहाँको भनाइ थियो। त्यसको लागि आत्मबल बढाउने, आत्मविश्वास जगाउने काम नगरपालिकाले गर्नुपर्ने पनि उहाँले बताउनुभयो। जसको लागि नगरपालिकाले विभिन्न तालिमहरू सञ्चालन गर्दै जाने पनि नगर प्रमुख खाणले बताउनुभयो ।
युवाहरूलाई आफ्नो कामप्रति अझै अगाडि बढ्न प्रोत्साहन गर्ने उद्देश्यले वडा नम्बर(९ ले यो सम्मान कार्यक्रम राखेको तिलोतमा नगरपालिका वडा नम्बर(९ का अध्यक्ष ध्रुव न्यौपानेले बताउनुभयो। नेपालमै बसेर पनि केही गर्न सकिन्छ भन्ने सोचले अगाडि बढिरहेका व्यवसायी युवाहरूलाई देखेर आफूलाई निकै खुसी लागेको उहाँको भनाइ थियो। वडा सदस्य लक्ष्मण गुरुङले सञ्चालन गर्नुभएको कार्यक्रममा कार्यपालिका सदस्य तारा सुनार, रवि सेन्चुरी, वडा सदस्य कमल रेग्मी लगायतको उपस्थिति रहेको थियो।