लुदस, कपिलबस्तु ।
कपिलवस्तुमा विद्यार्थी बोकेको बस पल्टिँदा ७ जना घाइते भएका छन्। सोमबार जिल्लाको मायादेवी गाउँपालिका– ३ बर्सौलीमा विद्यार्थी बोकेको स्कुल बस पल्टिँदा ७ जना विद्यार्थी घाइते भएको जिल्ला प्रहरी कार्यालय कपिलवस्तुले जनाएको छ । शुद्धोदन गाउँपालिका १ मा रहेको सनलाइट इङ्लिस बोर्डिङको लु १ क ५७२२ नम्बरको बस फुलीकाबाट बगदीतर्फ आउँदै गर्दा पल्टिएको प्रहरीले जनाएको छ । दुर्घटनामा कपिलवस्तुको मायादेवी गाउँपालिका ३ खैरेटी बस्ने १२ वर्षीय प्रान्सु पाल, १४ वर्षकी अनिता बराई, ११ वर्षीय विशेष थारु, ८ वर्षीय अमन यादव, ८ वर्षीय सुदिप यादव, टिकौली बस्ने १० वर्षीय आईसा भट्टराई, १४ वर्षीय गुन्जा कहार घाइते भएका हुन् । घाइतेहरूलाई युनिभर्सल मेडिकल कलेज भैरहवामा उपचारका लागि पठाइएको प्रहरीले जनाएको छ । चालक र बस नियन्त्रण लिएर थप अनुसन्धान भइरहेको प्रहरीले जनाएको छ ।