कपिलवस्तु,
जिल्ला प्रशासन कार्यालय कपिलवस्तु मा बसेको समन्वय तथा सद्भाव बैठकले जिल्लामा उत्पन्न भएको साम्प्रदायिक तनावलाई नियन्त्रण गर्दै शान्ति कायम गर्न महत्वपूर्ण निर्णयहरू गरेको छ।
महाराजगञ्ज नगरपालिकाको बरसवा क्षेत्रमा रहेको काली मन्दिरमा ढुंगा हान्ने, तोडफोड गर्ने तथा मन्दिरका सामग्रीमा क्षति पुर्याउने घटनापछि हिन्दु र मुस्लिम समुदायबीच तनाव सिर्जना भएको थियो। घटनापछि जुलुस प्रदर्शन तथा चक्काजाम जस्ता गतिविधि बढ्दै असामान्य अवस्था सिर्जना भएको थियो।
बैठकले आगामी दिनमा कुनै पनि पक्षबाट हिंसात्मक तथा उक्साहटपूर्ण गतिविधि नगर्न र साम्प्रदायिक सद्भाव खल्बलिने कार्य रोक्न सबै पक्षलाई आग्रह गर्दै सामूहिक प्रतिबद्धता जनाएको छ।
घटनामा संलग्न केही व्यक्तिहरूलाई प्रहरीले पक्राउ गरिसकेको र अन्यको खोजी तथा अनुसन्धान जारी रहेको जनाइएको छ। दोषीलाई कानून बमोजिम कडा कारबाही गरिने प्रशासनले स्पष्ट पारेको छ।
त्यसैगरी, घटनामा घाइते भएका व्यक्तिहरूको शीघ्र स्वास्थ्यलाभको कामना गर्दै उपचारका लागि गृह मन्त्रालय र महाराजगञ्ज नगरपालिकालाई आवश्यक समन्वय गर्न अनुरोध गरिएको छ।
भ्रामक सूचना, घृणात्मक अभिव्यक्ति तथा उक्साहट फैलाउने गतिविधि नगर्न सचेत गराउँदै त्यस्ता कार्यमा संलग्नलाई तुरुन्त कानूनी कारबाही गरिने पनि बैठकले चेतावनी दिएको छ।
महाराजगञ्ज नगरपालिकाले स्थानीयस्तरमा शान्ति कायम गर्न सचेतना कार्यक्रम, मेलमिलाप तथा सहकार्यका कार्यक्रमलाई प्राथमिकता दिने, जोखिम क्षेत्रको पहिचान गर्ने र पीडितलाई सहयोग गर्ने निर्णय गरेको छ।
यसैबीच, बजार क्षेत्रका केही स्थानमा दुवै समुदायका व्यक्तिहरू भेला हुने क्रम जारी रहेकोले त्यस्ता गतिविधि नगर्न र घरमै बस्दै वातावरण सहज बनाउन सबैलाई प्रशासनले आग्रह गरेको छ।
कपिलवस्तुमा दुई समुदायबीचको विवादले उग्र रुप लिने संकेत देखिएपछि प्रशासनले निषेधाज्ञा बढाएको छ । जिल्ला प्रशासन कार्यालयले एक सूचनामार्फत् अनिश्चितकालीन निषेधाज्ञा जारी गरेको हो ।
हिजो बिहान त्यहाँको एक मन्दिरमा भजन चलिरहँदा हिन्दु र मुस्लिम समुदायका युवाहरुबीच झडप सिर्जना भएको थियो । झडपले सामाजिक सद्भाव खल्बल्याउने देखिएपछि प्रशासले हिजै दिउँसो २ बजेदेखि महराजगन्ज नगरपालिकाको पूर्वमा बर्गदी पुल, पश्चिममा बहादुरगन्ज चोक, उत्तरमा महाराजगन्ज बजार र दक्षिणमा हर्दौनासम्मकाे क्षेत्रलाई निषेधित क्षेत्र घोषणा गरेको थियो । आज पनि प्रशासनले दिउँसो १ बजेदेखि लागू हुनेगरी अर्को सूचना जारी नभएसम्मको लागि चार स्थान तोकेर निषेधाज्ञा यथावत रहेको जनाएको हो ।
प्रमुख जिल्ला अधिकारी जनार्दन गौतमका अनुसार पूर्वमामा लबनी चोक, पश्चिममा वर्गदीघाटको पुल, उत्तरमा पचेहरा चोक र दक्षिणमा धर्मभक्त माविसम्म निषेधाज्ञा जारी गरिएको हो । उक्त क्षेत्रभित्र कुनै पनि भेला, सभा, जुलुस र प्रदर्शन नगर्न प्रशासनको आग्रह छ ।
