लुदस,कपिलवस्तु —
शुद्धोधन गाउँपालिका–६ को वडा कार्यालयमा अर्काको जग्गाको कित्ताकाट सम्बन्धी सिफारिस गराउन दबाब दिएको आरोपमा एक जनालाई प्रहरीले पक्राउ गरेको छ ।
वडा सचिव बद्री यादवका अनुसार शुद्धोधन गाउँपालिका–६ निवासी तेजप्रताप चौहानले रामसमार यादव र राकेशचन्द्र चौधरी कुर्मीको नाममा रहेको जग्गाको कित्ताकाट सम्बन्धी सिफारिस गराइदिन अर्के व्यक्तिको नाममा चौहनले सिफारिस माग गरेका थिए । उनले सिफारिसका लागि विभिन्न माध्यमबाट दबाब दिँदै आएका थिए। सिफारिस नदिएपछि उनले हुलाकमार्फत समेत वडा कार्यालयमा निवेदन पठाएको वडा कार्यालयको भनाइ छ ।
वडा सचिव यादवले चौहानले कर्मचारीलाई धम्कीसमेत दिएको र अर्काको जग्गासम्बन्धी कागजातमा सिफारिस गराउन खोजेको आशंकापछि प्रहरीलाई खबर गरिएको बताए। उनका अनुसार चौहानले गलत मनसायका साथ बिचौलियाको भूमिकामा रही सिफारिस लिन खोजेको आरोप छ .
यता जग्गाधनी रामसमार यादवले उक्त जग्गा आफ्ना पुर्खाले २०५२ सालमै खरिद गरेको दाबी गर्दै पूर्व जग्गाधनीकी श्रीमतीलाई आर्थिक प्रलोभनमा पारेर आफ्नो चौहनले जग्गाको आफुलाई थाहै नदिई सिफारिस गराउने प्रयास भएको आरोप लगाए।
आज वडा कार्यालय पुगेका चौहानलाई इलाका प्रहरी कार्यालय पकडीको टोलीले नियन्त्रणमा लिई थप अनुसन्धानका लागि जिल्ला प्रहरी कार्यालय कपिलवस्तु पठाएको प्रहरीले जनाएको छ ।
घटनाबारे प्रहरीले आवश्यक अनुसन्धान अघि बढाएको जनाएको छ ।
