हरि आचार्य अर्घाखाँची, जेठ ८

पछिल्लो समय जन्म दिनको अवसरमा विभिन्न होटल तथा रेष्टुरेण्टहरुमा फजुल खर्च गर्ने प्रवृति बढिरहेको पाईन्छ । पश्चिमेली संस्कृति अनुसरण गरि जन्म दिनमा केक काट्ने साथीभाईहरुलाई डाक्ने अनि नाँचगान गरी रमाईलो गर्ने प्रचलन पनि नभएको होईन ।
तर एक जनप्रतिनिधी भने आफ्नो जन्मोत्सवमा एकल तथा अति विपन्न परिवारको साहारा बनेका छन् । अर्घाखाँचीको शितगंगा नगरपालिका वडा नं. १३ का वडाअध्यक्ष दुर्गा बहादुर विसीले आफ्नो जन्मोत्सव एकल तथा विपन्न परिवारसंग मनाएका हुन् ।

वडाअध्यक्ष विसीले जन्मदिनको अवसरमा गरिव परिवारलाई आर्थिक सहयोग तथा पौष्टिक आहार प्रदान गरी उदाहरणिय कार्य गरेका हुन् । उनले वडा नंं. १३ कमला विसीलाई आर्थिक सहयोग गर्नुका साथै सर्वोत्तम पिठो, हर्लिक्स लगायतका पौष्टिक आहार प्रदान गरेका हुन् । २ छोरा १ छोरी गरी कमलाको परिवार ४ जनाको रहेको छ । विश्वभर महामारीको रुपमा फैलिएको कोरोना भाईरस (कोभिड १९) का कारण लकडाउनको यो विषम परिस्थितीमा सहयोग पाउँदा कमला विसीको परिवारले खुसी व्यक्त गर्दै वडाअध्यक्ष विसीलाई धन्यवाद सहित जन्म दिनको शुभकामना व्यक्त गरेको थियो ।

सहयोग रकम तथा पौष्टिक आहार हस्तान्त्रण गर्दै वडाअध्यक्ष विसीले जन्मोत्सवमा फजुल खर्च नगरी अति विपन्न परिवारलाई सहयोग गर्न पाउँदा खुसी महसुश भएको बताए । उनले आफु एक जनप्रतिनिधी भएकोले लकडाउनको यो विषम परिस्थितीमा उक्त कार्य गरेको बताए । वडाअध्यक्ष विसीले यो संकटको बेलामा अति गरिव परिवारहरुलाई सबैले सक्दो सहयोग गर्न पनि आग्रह गरेका छन् ।