नेकपा कम्युनिस्ट सरकार नभएको : चित्रबहादुर केसी

ByLumbini Darpan Online

१३ असार २०७७, शनिबार ११:०६ १३ असार २०७७, शनिबार ११:०६ १३ असार २०७७, शनिबार ११:०६

यो कम्युनिष्ट सरकार होइन, भ्रष्टाचार केन्द्रदेखि तलसम्म फैलिएको छ’
१३ असार, काठमाडौं ।
चित्रबहादुर केसी नेतृत्वको राष्ट्रिय जनमोर्चाले नेकपा कम्युनिस्ट सरकार नभएको आरोप लगाएको छ । तर, अहिले भारतले केपी ओलीलाई हटाएर देशमा राजतन्त्र ल्याउन खोजिरहेको जनमोर्चाको दाबी छ ।पार्टीको बैठकले गरेका निर्णयहरु सार्वजनिक गर्दै शनिबार जनमोर्चा अध्यक्ष केसीले प्रेस वक्तव्यमा भनेका छन्, ‘हामीले शुरुदेखि नै बताउँदै आएका छौँ कि नेकपाको सरकार कम्युनिस्ट सरकार होइन । यो गणतन्त्र पनि बर्जुवा व्यवस्था हो । यिनबाट देश र जनताका सम्पूर्ण समस्याहरुको समाधान हुँदैन ।’

तैपनि तुलनात्मक दृष्टिले अहिलेको अवस्थामा नेकपा गणतन्त्र र धर्म निरपेक्षताको पक्षमा उभिनु सकारात्मक भएको केसीद्वारा जारी वक्तव्यमा उल्लेख छ । संसदमा एक सीटको प्रतिनिधित्व गर्ने पार्टीका रुपमा रहेको जनमोर्चाले ओली सरकारको मूल्यांकन गर्दै भनेको छ, ‘नेपाली भूमि फिर्ता गर्ने, त्यसका लागि नयाँ नक्सा जारी गर्ने, नेपाली पुरुषसँग विवाह गर्ने विदेशी महिला ७ वर्षसम्म लगातार नेपालमा बसेको हुनुपर्ने व्यवस्था गर्ने कार्य सकारात्मक र महत्वपूर्ण छन् ।’

राष्ट्रिय जनमोर्चाले एमसीसी सम्झौता नेपालको हितमा नभएको मात्र होइन, गम्भीर राष्ट्रघाती भएको बताएको छ । ‘यो अमेरिकाको हिन्द प्रशान्त रणनीतिको अंग हो । यसबारे नेपालस्थित अमेरिकी राजदुताबासका अधिकारी र अमेरिकाको सुरक्षा निकाय -पेन्टागन)ले स्पष्ट गरिसकेका छन्’ जनमोर्चाको वक्तव्यमा भनिएको छ । ‘त्यो रणनीतिको उद्देश्य अमेरिकी साम्राज्यवादी नीतिलाई सामरिक रुपले हिन्द प्रशान्त क्षेत्रमा मद्दत पुराउनु हो । त्यसलाई संसदबाट पारित गरेपछि हाम्रो असंलग्न परराष्ट्र नीति कायम रहने छैन र हामी अमेरिकी क्याम्पमा खडा हुन पुग्नेछाँै ।’अझै पनि ओली नेतृत्वको सरकार र अमेरिकी ट्रम्प प्रशासन त्यसलाई संसदबाट पारित गरी लागु गर्न प्रयत्न गरिरहेको बताउँदै जनमोर्चाले भनेको छ, ‘अमेरिकी विदेशमन्त्रीले त्यसबारे गम्भीर चासो देखाएका छन् र नेपाल सरकारका विदेश मन्त्रीले आगामी संसदको अधिवेशनबाट त्यसलाई पारित गर्ने आश्वासन दिएका छन् । त्यसकारण, त्यसका विरुद्धको संघर्षलाई जारी राख्नुपर्ने आवश्यकता छ ।’

जनमोर्चाले ७ वर्षपछि मात्रै बैबाहिक नागरिकता दिने सरकारी प्रस्तावलाई भने सही नीति बताउँदै समर्थन गरेको छ । त्यसैगरी, लिम्पियाधुरासहितको नेपालको भूमि फिर्ता लिन नेपालमा अपूर्व एकता प्रदर्शन भएको भन्दै जनमोर्चाले यसमा सरकारको अडानप्रति समर्थन जनाएको छ । कोरोना रोकथामका लागि भने ओली सरकारले गतिलो काम गर्न नसकेको जनमोर्चाको ठहर छ । ओली सरकार भ्रष्टाचारमा डुबेको केसीले बताएका छन् ।

Facebook Comments Box

Leave a Reply

Your email address will not be published. Required fields are marked *