काठमाडौँ केन्द्रीय सरकारले कोरोना सङ्क्रमितलाई आफ्नो उपचार आफै गर्नुपर्ने बताइरहेका बेला लुम्बिनी प्रदेश सरकारले भने सङ्क्रमितको निःशुल्क उपचार गर्ने घोषणा गरेको छ ।
केन्द्र सरकारले गरेको निणर्य हप्ता दिन वित्न नपाउदै लुम्विनी प्रदेशका मुख्यमन्त्री शङ्कर पोखरेलले मङ्गलबार सामाजिक सञ्जाल फेसबुकमा स्टाटस लेख्दै लुम्बिनी प्रदेश सरकारले लक्षण देखिएका र अस्पतालमा भर्ना गरी उपचार गर्नुपर्ने अवस्थाका सबै कोरोना सङ्क्रमित बिरामीहरूलाई निःशुल्क उपचार गर्ने बताए ।
त्यसका लाथि लुम्बिनी प्रदेशका चार वटा कोरोना अस्पतालबाट सङ्क्रमितहरूको उपचार हुने उहाँले स्पष्ट पार्नुभएको छ । लुम्बिनी प्रदेश सरकारले लुम्बिनी प्रादेशिक अस्पताल बुटवल, भिम अस्पताल भैरहवा, दाङको बेलझुण्डीस्थित केन्द्रीय आयुर्वेद अस्पताल र भेरी अस्पताल बाँकेलाई कोरोना विशेष अस्पतालको रूपमा प्रयोग गर्दै आएको छ ।
मुख्यमन्त्री पोखरेलले फेसबुकमा स्टाटस लेख्दै भन्नुभएको छ- ‘सरकारले लुम्बिनी प्रदेशका चार वटै कोरोना विशेष अस्पतालमा लक्षण देखिएका बिरामीका लागि निःशुल्क उपचारको व्यवस्था यथावत राखेका छ ।’
स्वास्थ्य तथा जनसङ्ख्या मन्त्रालयले गरिब, अति विपन्न तथा अशक्तबाहेकका कोरोना सङ्क्रमित बिरामीको उपचार सरकारले नगर्ने निणर्य गरेपछि नागरिक स्तरबाट सरकारको चर्को आलोचना तथा विरोध हुँदै आएको छ ।
लुम्बिनी प्रदेश सामाजिक विकास मन्त्रालयले यसअघि नै निःशुल्क गर्दै आएको उपचारलाई रोक्न र शुल्क लिन प्रदेश सरकार र मन्त्रालयमार्फत कुनै पनि परिपत्र नगरिएको र निःशुल्क उपचारको व्यवस्था यथावत रहेको पनि स्पष्ट पारेको छ ।
