हरि आचार्य कपिलवस्तु, चैत २३
कपिलवस्तुको वाणगंगा नगरपालिका र नगरपालिकाभित्र रहेका औषधी व्यवसायी, खाद्यान्न उद्योग व्यवसायीहरूसंग विपद ब्यवस्थापन सम्बन्धमा बैठक सम्पन्न गरिएको छ । विश्व महामारीको रुपमा फैलिरहेको कोरोना भाईरस (कोभिड १९) को संक्रमण फैलन नदिन सरकारले घोषणा गरेको लकडाउनको अवधिमा गरिव विपन्न परिवारलाई एकद्धार प्रणाली राहत प्रदान गरिने निर्णय गरेसंगै नगरपालिकाले दैनिक जसो बैठक तथा छलफल गरिरहेको छ ।

राहतका लागि नगरले सञ्चालन गरको दैवि प्रकोप कोष खातामा नगद जम्मा गर्न अनुरोध गर्दै विविध विषयमा छलफल गरिएको नगर प्रवक्ता विष्णु पौडेलले जानकारी दिएका छन् । बैठकमा नगर भित्रका औषधी व्यवसायी तथा खाद्यान्नय उद्योगी व्यवसायीहरुले नगर भित्र ६ महिना सम्म औषधी, खाद्यान्न तथा दैनिक उपभोग्य वस्तुको अभाव हुन नदिने प्रतिवद्धता व्यक्त गरेका छन् । उनीहरुले छलफल पश्चात सक्दो सहयोग गर्ने बताएका छन् । सोहि क्रममा प्रतिभा सामुदायिक वन उपभोक्ता समुह ले ७५ हजार प्रदान गरेको छ ।

अन्य संघ, संस्था तथा सामुदायिक वनहरुले सहयोग गरिसकेका छन् भने केहिले सहयोग गर्ने उद्घोष गरेका छन् । एकद्धार प्रणालीबाट राहत वितरण गरि व्यवस्थित रुपमा वास्तविक गरिवहरुलाई राहत प्रदान गर्नका लागि नगर उपप्रमुख चक्रपाणि अर्यालको संयोजकत्वमा नगरस्तरिय राहत वितरण समिति गठन गरिएको छ । सोहि समितिको सक्रियतामा सहयोग, खाद्य तथा दैनिक उपभोग्य बस्तुहरु जम्मा गर्ने कार्य भईरहेको नगरपालिकाले जनाएको छ ।