लुदअ सर्लाही, पुष २
मलंगवा नगरपालिका–४ शिवसागर चोकस्थित जय बजरंग प्लाई इन्डष्ट्रिमा आगलागी भएको छ। विद्युत् सर्ट भएर बुधबार साँझ ७ बजे आगलागी भएको थियो। आगाराति साढे ८ बजे नियन्त्रणमा लिएको प्रहरीले जनाएको छ।
मलंगवा नगरपालिकाको दमकल नभएकाले हरिवन नगरपालिकाबाट गएको दमकलले आगो नियन्त्रणमा लिएको थियो। मलंगवाको दमकल बिग्रेर बनाउनका लागि केही दिनअघि नै वीरगञ्ज पठाइएको बताइएको छ। हरिवनको दमकलसँगै नेपाली सेना, प्रहरी, सशस्त्र प्रहरी, स्थानीय बासिन्दाले आगो नियन्त्रणमा लिएका थिए।
प्लाई बनाउने मेशिन स्थलबाट विद्युत् सर्ट भई अगलागी हुँदा उपकरणहरु र कच्चा पदार्थ जलेर नष्ट भएको प्रहरीले जनाएको छ। आगलागीबाट लाखौंको क्षति भएको अनुमान गरिए पनि बिहिवार बिहानसम्म क्षतिको यकिन तथ्यांक भने आइनसकेको जिल्ला प्रहरी कार्यालय सर्लाहीका प्रहरी प्रवक्ता प्रहरी नायब उपरीक्षक मदन कुँवरले बताए।
