नवलपरासी , २६ बैशाख ः
पश्चिम नवलपरासी जिल्लामा कोरोना संक्रमणको अवस्था भयावह बन्दै गएको छ । संक्रमणका कारण दैनिक रुपमा २ देखि ५ जनासम्मको मृत्यु हुने गरेको छ । पहिलो लहरको एक वर्षमा मृत्यु हुनेको संख्या भन्दा दोस्रो लहरको २० दिनको अवधिमा मृत्यु हुनेको संख्या बढी छ । संक्रमणका कारण गतवर्ष ३३ जनाको मृत्यु भएको थियो । जिल्लामा बैशाखको पहिलो सातादेखि संक्रमितहरुको मृत्यु हुन सुरु भएको हो । यो अवधिको आज (आइतबार मध्यान्ह) सम्म मृत्यु हुनेको संख्या ३८ पुगेको स्वास्थ्य कार्यालयका कोरोना फोकल पर्सन देविलाल पौडेलले जानकारी दिए । शनिबार ५ जना र आइतबार मध्यान्हसम्म ५ जना गरी दुई दिनको अवधिमा १० जनाको मृत्यु भएको पौडेलले बताए । सक्रिय संक्रमितहरु घरमै बस्ने र गंभिर अवस्थामा पुगेपछि मात्र अस्पताल पुग्ने भएकाले समयमा उपचार नपाउँदा मृत्यु हुनेको संख्या बढेको स्वास्थ्य कार्यालयले जनाएको छ । अहिले संक्रिय संक्रमितको संख्या १ हजार नाघेको छ ।
पहिलो र दोस्रो लहरको संक्रमणका कारण जिल्लामा ७१ जनाको मृत्यु भएको छ ।