लुदअ असोज २९, काठमाण्डौ
मान्यजनको हातबाट दशैँको टीका लगाउन जानेहरु बढेसँगै काठमाण्डौमा पुनः चहलपहल बढ्न थालेको छ ।
शुभ साइतमा घरमा टीका लगाएर आफन्तकोमा जाने क्रम बढेसँगै काठमाण्डौ उपत्यकाका सडकमा मानिसहरुको चहलपहल बढ्न थालेको हो । विजया दशमीका दिन रातो टीका र पहेँलो जमरा लगाएर देशभर हर्षोल्लासका साथ विजया दशमी मनाउने चलन छ । घटस्थापनाका दिन राखिएको जमरा आज दुर्गादेवीको प्रसादको रुपमा लगाउने गरिन्छ ।
असत्यमाथि सत्य र आसुरीक शक्तिमाथि दैविक शक्तिले विजय पाएको दिनको रुपमा विजया दशमी मनाउने चलन रहेको छ । आजका दिन परिवारका ठूलो सदस्यहरुबाट टीका तथा जमरा लगाइने चलन छ । आम सर्वसाधारणहरु बडादशैँ मनाउन काठमाडौंबाट गाउँ फर्किएसँगै महाष्टमीदेखि सुनसान रहेको काठमाण्डौमा पुनः चहलपहल बढ्न थालेको छ ।
प्रकाशित : २०७८ आश्विन २९, शुक्रबार १५:१२
