धनगढी , कात्तिक २
कैलालीका सबै खोला तथा नदीमा पानीको बहाव उच्च बनेको छ । लगातारको वर्षाका कारण कैलालीका अधिकांश स्थानमा बाढी आएको जिल्ला प्रहरी कार्यालयले जानकारी दिएको छ । मोहना, कान्द्रा, कर्णाली नदीमा पनि पानीको बहाब उच्च रहेको जिल्ला प्रहरी कार्यालयको सञ्चार टोलीले जनाएको छ ।

यसैगरी लगातारको वर्षाका कारण कैलालीको पहाडी क्षेत्रका विभिन्न स्थानमा पहिरो गएको छ । कैलालीको फल्टुडेस्थित भीमदत्त राजमार्गमा पहिरो जाँदा सुदूरपश्चिमका ७ पहाडी जिल्लाको यातायात प्रभावित बनेको छ । क्षतिको थप विवरण आउन बाँकी रहेको कैलाली प्रहरी प्रवक्ता डीसएसपी प्रतीक बिष्टले बताए ।

खुटिया नदी बस्तीसम्म पुग्न सक्ने देखिएपछि प्रहरी परिचालन गरि तटीय क्षेत्रका बासिन्दालाई सतर्क गराउने काम भइरहेको जिल्ला प्रहरी कार्यालयको सञ्चार टोलीले जनाएको छ ।